विजय मल्ल्यासोबत धम्माल; ख्रिस गेल झाला ट्रोल

नवी दिल्ली:

भारतीय बँकांचे कोट्यवधींचे कर्ज बुडवून विदेशात पसार झालेल्या विजय मल्ल्यासोबतचा फोटो शेअर करणं वेस्ट इंडिजचा स्फोटक फलंदाज ख्रिस गेलला चांगलंच महागात पडलं आहे. गेलनं मल्ल्यासोबतचा फोटो ट्विटरवरून शेअर केला असून, मल्ल्याचा उल्लेख त्यानं बिग बॉस असा केला आहे. यावरून गेल ट्रोल झाला आहे.

फॉर्मुला वन ब्रिटिश ग्रॅण्ड प्रिक्स २०१९ ला आजपासून सुरुवात झाली असून, काल शनिवारी ख्रिस गेल आणि विजय मल्ल्या यांची भेट झाली होती. या भेटीचा फोटो गेलनं ट्विटरवर शेअर केला. 'बिग बॉस विजय मल्ल्याला भेटून खूप चांगलं वाटलं. रॉकस्टार...' असं त्यानं ट्विटमध्ये लिहिलं. यानंतर नेटकऱ्यांनी गेलवर टीकेची झोड उठवली. विजय मल्ल्याला बॉस म्हणणाऱ्या गेलला लाज वाटली पाहिजे, असं एका यूजरनं म्हटलं आहे. मल्ल्याला तुझ्या बँक अकाऊंटची माहिती देऊ नको, असंही एका यूजरनं म्हटलं आहे.