भाजपला धक्का; विजय रुपाणी पिछाडीवर

अहमदाबाद: गुजरात विधानसभा निवडणुकीच्या सुरुवातीच्या मतमोजणीत भाजपनं आघाडी घेतली असली तरी राजकोट पश्चिम मतदारसंघातून गुजरातचे मुख्यमंत्री विजय रुपाणी मागे पडले आहेत. काँग्रेसचे उमेदवार इंद्रनील राजगुरू यांनी रुपाणी यांच्यावर तब्बल सहा हजार मतांची आघाडी घेतली आहे.

आनंदीबेन पटेल यांच्या राजीनाम्यानंतर भाजपाध्यक्ष अमित शहा यांनी मुख्यमंत्री म्हणून विजय रुपाणी यांची निवड केली होती. मोदी-शहांच्या अनुपस्थितीत रुपाणी यांनी गुजरातमध्ये भाजपला सावरण्याचा प्रयत्न केला असला तरी सरकार म्हणून त्यांना फारशी चमकदार कामगिरी करता आलेली नाही. काँग्रेसनं त्याचंच भांडवल करत रुपाणी यांच्या विरोधात जोरदार प्रचार केला होता. काँग्रेसचे उमेदवार राजगुरू यांना प्रचारात मोठा प्रतिसादही मिळत होता. त्याचंच प्रतिबिंब मतमोजणीत दिसत आहे.

राजकोट हा संपूर्णपणे शहरी मतदारसंघ आहे. २००२मध्ये नरेंद्र मोदी यांनी या जागेवरून निवडणूक जिंकली होती. २०१२च्या निवडणुकीत इंद्रनील राजगुरू यांनी राजकोट पश्चिम मतदारसंघातून ६०,८७७ मतांनी विजय मिळवला होता. तर, २०१४च्या पोटनिवडणुकीत रुपाणी यांनी ८१,०९२ मतांनी याच जागेवरून बाजी मारली होती. रुपाणी हे राजकोटचं महापौरपदही भूषवलं आहे. मात्र, आता ही जागा टिकवताना त्यांची दमछाक होत आहे.