सरसंघचालकांना रोखणाऱ्या कलेक्टरची बदली

मटा ऑनलाइन वृत्त । पलक्कड

स्वातंत्र्य दिनाच्या दिवशी नियमांची जंत्री पुढे करत राष्ट्रीय स्वयंसेवक संघाचे सरसंघचालक मोहन भागवत यांना ध्वजारोहण करण्यापासून रोखणाऱ्या पलक्कडच्या जिल्हाधिकाऱ्याची बदली करण्यात आली आहे. मात्र या बदलीचा आणि स्वातंत्र्य दिनाच्या घटनेचा काहीही संबंध नसल्याचा खुलासा प्रशासनाने केल्याचं सुत्रांनी सांगितलं.

स्वातंत्र्य दिनी पलक्कडच्या एका शाळेत मोहन भागवत यांना ध्वजारोहणासाठी पाचारण करण्यात आलं होतं. मात्र सरकारी अनुदान घेणाऱ्या शाळेमध्ये शिक्षक आणि लोकप्रतिनिधींशिवाय कोणताही राजकीय नेता ध्वजारोहण करू शकत नसल्याचं सांगत या जिल्हाधिकाऱ्याने शाळेला मेमो पाठवला होता. मात्र जिल्हाधिकाऱ्यांचे हे आदेश अवाजवी असल्याचं सांगत भाजपने त्याला विरोध केला होता. भागवत यांनीही जिल्हाधिकाऱ्यांचे निर्देश डावलत शाळेत ध्वजारोहण केलं होतं. या पार्श्वभूमीवर जिल्हाधिकाऱ्याची बदली करण्यात आल्याने आश्चर्य व्यक्त केलं जात आहे. दरम्यान, नियमभंग केल्यामुळे जिल्हा प्रशासन या शाळेवर सुद्धा कारवाई करणार असल्याची चर्चा आहे.