राष्ट्रगीताच्या छायाचित्राशेजारी सेक्सचं चित्र

मटा ऑनलाइन वृत्त | कन्नूर

राष्ट्रगीत सुरू असल्याचं दाखवणाऱ्या एका छायाचित्राच्या बाजूला स्त्री-पुरुष सेक्स करत असतानाचं चित्र छापण्यात आल्यानं केरळमधील एका महाविद्यालयात नवा वाद निर्माण झाला आहे. मार्क्सवादी कम्युनिस्ट पक्षाचा समर्थक असलेल्या विद्यार्थ्यानं हे वादग्रस्त छायाचित्र छापल्याचं समोर आलं आहे.

ब्रेनन महाविद्यालयाच्या १२५ व्या वर्षपूर्तीच्या निमित्ताने 'स्टुडंट फेडरेशेन ऑफ इंडिया'च्या विद्यार्थ्यांनी 'पेलेट' नावाचा विशेषांक प्रकाशित केला आहे. या विशेषांकात हे व्यंगचित्र रेखाटण्यात आलं आहे. चित्राच्या पार्श्वभूमीवर राष्ट्रध्वज देखील रेखाटण्यात आलाय. विशेषांकातील हे छायाचित्र वादाचं कारण ठरलं असून राष्ट्रगीत आणि राष्ट्रध्वाजाचा अपमान केल्याप्रकरणी संबंधितांवर कारवाईची मागणी अखिल भारतीय विद्यर्थी परिषदेने केली आहे.



महाविद्यालयाचे प्राचार्य मुरलीदास यांनी मात्र विद्यार्थ्यांची पाठराखण केली आहे. 'विशेषांकातील ते छायाचित्र चुकीच नाही. संकुचित मानसिकतेने त्याकडे पाहिलं तर गैरसमज निर्माण होतात. तुम्ही एखाद्या गोष्टीकडं कसं पाहाता, यावर तुमची विचारसरणी ठरते, असं ते म्हणाले. 'नाराज विद्यार्थ्यांची समजूत काढण्याचे प्रयत्न सुरू आहेत', असंही त्यांनी स्पष्ट केलं.