सुप्रीम कोर्टाने फेटाळली फेरविचार याचिका
वृत्तसंस्था, नवी दिल्ली
केंद्रीय गुन्हे अन्वेषण खात्याच्या (सीबीआय) विशेष संचालकपदी राकेश अस्थाना यांची नियुक्ती वैध ठरविणाऱ्या निकालाचा फेरविचार करण्याची मागणी करणारी क्युरेटिव्ह पीटीशन सर्वोच्च न्यायालयाने शुक्रवारी फेटाळली.
अस्थाना हे गुजरात केडरचे असून, त्यांची सीबीआयच्या विशेष संचालकपदी नियुक्ती करण्यात आली होती. त्यास काही स्वयंसेवी संस्थांनी सर्वोच्च न्यायालयात आव्हान दिले होते. मात्र न्यायालयाने नियुक्ती वैध ठरविली. त्यावर या संस्थांनी पुन्हा फेरविचार करण्याची मागणी करणारी याचिका दाखल केली. त्यावर आज वकिलांच्या अनुपस्थितीत न्यायमू्र्तींच्या चेंबरमध्ये सुनावणी झाली. सरन्यायाधीश रंजन गोगोई यांच्या नेतृत्वाखालील खंडपीठाने ही याचिका फेटाळली.
अस्थाना आणि सीबीआयचे संचालक अलोक वर्मा यांच्यात धुमश्चक्री सुरू असून, त्याची परिणती अस्थाना आणि वर्मा यांना हटविण्यात झाली होती. या दोन्ही अधिकाऱ्यांच्या याचिकांवर सध्या सर्वोच्च न्यायालयात सुनावणी सुरू आहे.