वृत्तसंस्था, नवी दिल्ली
बेहिशेबी मालमत्ता घोटाळा प्रकरणात अटक करण्यात आलेले कर्नाटक काँग्रेसचे नेते डी. के. शिवकुमार यांच्या पत्नी आणि मातोश्रींना अंमलबजावणी संचालनालयासमोर उपस्थित राहण्याची इतक्यात आवश्यकता नाही, असे 'ईडी'ने दिल्ली उच्च न्यायालयासमोर सांगितले.
'ईडी'ने शिवकुमार यांच्या पत्नी उशा शिवकुमार आणि त्यांच्या मातोश्री गौरम्मा यांना जारी केलेल्या समन्सविरोधात दोघींनीही कोर्टामध्ये आपापल्या वेगळ्या याचिका सादर केल्या होत्या. या याचिकांवर 'ईडी'ने आपले म्हणणे कोर्टासमोर सादर केले. 'ईडी'ने गौरम्मा आणि उशा यांना १५ आणि १७ ऑक्टोबर रोजी उपस्थित राहण्याविषयी समन्स बजावले होते. गौरम्मा या 'ईडी'समोर उपस्थित झाल्या नाहीत. गौरम्मा या ८५ वर्षांच्या असून त्यांना समन्स बजावून 'ईडी'ने कायद्याचे उल्लंघन केले आहे. १५ वर्षांखालील आणि ६५ वर्षांवरील व्यक्तींना पोलिस स्टेशनमध्ये बोलावले जात नाही, असा युक्तिवाद गौरम्मा यांच्या वकिलाने केला. 'ईडी'ने न्या. ब्रजेश सेठी यांना सांगितले, की उशा यांना गुरुवारी 'ईडी'समोर उपस्थित राहण्याची आवश्यकता नाही. या दोघींविरोधात सात दिवसांत पुन्हा वेगळे समन्स बजावण्यात येणार आहे. त्यामुळे त्यांना 'ईडी'समोर उपस्थित राहण्याची गरज नाही. कोर्टाने पुढील सुनावणी २१ ऑक्टोबर रोजी ठेवली आहे. शिवकुमार यांना अटक करून तिहार तुरुंगात ठेवण्यात आले आहे.