आता ५ मिनिटांत मिळणार पॅन कार्ड

मटा ऑनलाइन वृत्त । नवी दिल्ली

लवकरच केवळ काही मिनिटांत तुम्हाला पॅन कार्ड मिळू शकेल. इतकेच नाही तर तुम्ही स्मार्ट फोनवरून आपला आयकरही भरू शकणार आहात. करदात्यांच्या सोयीसाठी केंद्रीय प्रत्यक्ष कर बोर्डाने (सीबीडीटी) ई-केवायसी सुविधेचा वापर करत तत्काळ पॅन कार्ड देण्याच्या दिशेने काम सुरू केले आहे.

ई-केवायसीमुळे संबंधित व्यक्तीचा पत्ता, वैयक्तिक माहितीची पडताळणी केली जाते. 'जर ई-केवायसीद्वारे सिमकार्ड मिळू शकते तर पॅनकार्डही मिळू शकते,' असे एका अधिकाऱ्याने सांगितले. त्यांनी दिलेल्या माहितीनुसार, सध्या पॅन कार्डसाठी अर्ज केल्यावर ते मिळेपर्यंत २ ते ३ आठवड्यांचा कालावधी लागतो. नव्या प्रक्रियेत अवघ्या ५ ते ६ मिनिटांत पॅन कार्ड तयार होणार आहे. अर्थात या नव्या प्रक्रियेत पॅन क्रमांक त्वरित मिळणार असला तरी प्रत्यक्ष कार्ड नंतर देण्यात येईल. सीबीडीटी आणि कॉर्पोरेट व्यवहार मंत्रालयाने यापूर्वीच करार करून नव्या कंपन्यांना चार तासात पॅन कार्ड देण्याची प्रक्रिया सुरू केली आहे.

याव्यतिरिक्त, आयकर विभाग एक अॅप विकसित करत आहे. या अॅपद्वारे ऑनलाइन टॅक्स पेमेंट करता येणार आहे. या अॅपमध्ये पॅनकार्डासाठी अर्ज करणे, आपल्या करपरताव्याची माहिती मिळवणे आदि अन्य सेवादेखील उपलब्ध असतील. कंपनी यापूर्वीच आपल्या पोर्टलद्वारे बहुतांश सेवा ऑनलाइन देते. पण तरीही ज्येष्ठ नागरिक तसेच युवा करदात्यांना ही प्रक्रिया सोपी, सुलभ व्हावी हा यामागचा उद्देष आहे. प्रक्रिया संचालनालयाच्या देखरेखीखाली सीबीडीटीमध्ये अॅप आणि पॅन या दोन्ही प्रकल्पांवर काम करत आहे.