काश्मीर: 'हिजबूल'चा मुख्य कमांडर चकमकीत ठार; २ जवान शहीद

मटा ऑनलाइन वृत्त। श्रीनगर

जम्मू-काश्मीरमध्ये मोठी कारवाई करत भारतीय लष्कराने हिजबूल मुजाहिद्दीनचा मुख्य कमांडर यासीन इत्तू याला ठार केले आहे. शोपियानमधील अवनीरा गावात झालेल्या चकमकीत सुरक्षा दलाच्या जवानांनी ३ दहशतवाद्यांचा खात्मा केला. या तिघांमध्ये इत्तूचाही समावेश आहे. या चकमकीत २ भारतीय जवान शहीद झाले आहेत, तर ३ जवान जखमी झाले आहेत. बुरहान वानी आणि अबू दुजानाला ठार केल्यानंतरची काश्मीर खोऱ्यातील सुरक्षा दलाची ही मोठी कामगिरी मानली जात आहे.

शनिवारी रात्रीपासून शोपियानच्या अवनीरा गावात सुरक्षा दलाचे जवान आणि दहशतवाद्यांमध्ये ही चकमक सुरू होती. जवानांनी ठार केलेल्या दहशतवाद्याचे मृतदेह सापडले आहेत. इत्तूव्यतिरिक्त इतर दोन दहशतवाद्याची नावे इरफान-उल-हक शेख आणि माजिद शेख अशी आहेत. हे सर्व दहशतवादी हिजबूल मुजाहिद्दीन या दहशतवादी संघटनेशी संबंधीत आहेत. इत्तू हा बुरहान वानीचा निकटचा साथीदार होता. इत्तू हा महमूद गजनवी या नावाने देखील प्रसिद्ध आहे.

जम्मू-काश्मीरचे डीजीपी एस. पी. वैद्य यांनी चकमकीबाबत दिलेल्या माहितीनुसार, दहशतवाद्यांशी ही चकमक सुरू झाल्याबरोबर संपूर्ण विभाग रिकामा करण्यात आला. शनिवारी संध्याकाळी या भागात दहशतवादी असल्याची माहिती हाती आली होती. त्यानंतर राज्य पोलीस, सीआरपीएफ आणि ५५ राष्ट्रीय रायफल यांनी संयुक्तपणे ही कारवाई केली. जवानांनी संपूर्ण जैनपोरा विभागाला सर्व बाजूंनी घेरले.

या भागात आणखी काही दहशतवादी लपले असल्याचा संशय आहे. त्यांना हुडकून काढण्याचे काम युद्धपातळीवर सुरू आहे.

या चकमकीत तामिळनाडूचा इलयाराजा आणि महाराष्ट्राचा सुमेध वामन हे जवान शहीद झाले. जखमी झालेल्या ३ जवानांवर आर्मी हॉस्पिटलमध्ये उपचार सुरू आहेत.

दरम्यान, जम्मू-काश्मीरच्या बांदीपुरामधील हाजीन सेक्टरमध्ये दहशतवाद्यांच्या एका समूहाने पोलिसांच्या गस्तपथकावर हल्ला केला आहे. या हल्ल्यात २ पोलीस जखमी झाले आहेत. संपूर्ण विभाग रिकामा करून पोलीस लपलेल्या दहशतवाद्यांचा कसून शोध घेत आहेत.