अहमदाबाद: बाथरूममध्ये सेक्स करण्यास नकार; पत्नीला मारहाण

अहमदाबाद: गुजरातमधील एका १९ वर्षांच्या विवाहितेनं आपल्या पतीविरोधात लैंगिक अत्याचाराचा खटला दाखल केला आहे. बाथरूममध्ये सेक्स करण्यास नकार देत असल्यानं पती वारंवार मारहाण करत असल्याचा आरोप या महिलेनं केला आहे.

अहमदाबादच्या गोमतीनगर पोलीस ठाण्यात ही तक्रार आली आहे. सूत्रांनी दिलेल्या माहितीनुसार, तक्रारदार महिलेचे चार महिन्यांपूर्वी भावनगरच्या एका इसमाशी लग्न झाले होते. लग्नानंतर पहिल्या दिवसापासूनच तिचे सासू-सासरे तिला हुंड्यासाठी त्रास द्यायचे. अनेकदा तिची झोप मोड करून तिला हुंड्यासाठी छळायचे. तर, तिचा पती तिला बाथरूममध्ये घेऊन जाऊन सेक्स करण्यास भाग पाडायचा. तिने विरोध केल्यास मारहाण करायचा. तिच्या मोठ्या दीराने देखील तिच्यावर बलात्कार करण्याचा प्रयत्न केला होता. या त्रासाला कंटाळून पीडित महिलेनं अखेर पोलीस ठाणं गाठलं आणि आपल्या सासरच्यांविरोधात तक्रार दाखल केली. पोलिसांनी गुन्हा दाखल करून घेतला असून पुढील तपास सुरू आहे.