आरक्षणविरोधी बंदला संमिश्र प्रतिसाद

वृत्तसंस्था, भोपाळ/जयपूर/लखनौ

आरक्षणविरोधी पुकारण्यात आलेल्या बंदला देशात संमिश्र प्रतिसाद मिळाला. मध्य प्रदेश आणि राजस्थानसारख्या राज्यांमधील काही भागांत दुकाने बंद ठेवण्यात आली होती, तर संवेदनशील भागांमध्ये इंटरनेट सेवा बंद करण्यात आली होती.

बिहारमध्ये काही ठिकाणी रेल्वे रोखण्याचा प्रयत्न जाला, तर भोपाळमध्ये शाळांनी आपली बससेवा बंद ठेवली होती. जातीच्या आधारे नोकरी व शिक्षण संस्थांमध्ये आरक्षण देण्याविरोधात बंदची हाक सोशल मीडियावरून देण्यात आली होती. बंदची जबाबदारी घेण्यासाठी अद्याप कोणतीही संघटना पुढे आलेली नाही, असे मध्य प्रदेशातील काही अधिकाऱ्यांनी सांगितले. दलित संघटनांनी दोन एप्रिलला पुकारलेल्या बंदचा फटका भोपाळ आणि राजस्थानातील काही भागांना बसला होता. जयपूर येथे मोबाइल सेवा बंद ठेवण्यात आली होती. कोणताही अनुचित प्रकार घडल्यास त्वरित कारवाई करण्याचे आदेश राज्य सरकारने पोलिस प्रमुखांना आणि जिल्हा आयुक्तांना दिले होते. हिंसाचार झाल्यास संबंधित बागातील जिल्हा न्यायादंडाधिकारी आणि पोलिस अधीक्षकांना जबाबदार धरण्यात येईल, असे गृहमंत्रालयाने म्हटले होते.

दरम्यान, राजस्थानात शांतता अशल्याची माहिती पोलिस उपमहासंचालक (कायदा व सुव्यवस्था) एनआरके रेड्डी यांनी दिली. संवेदनशील भागांत सीमा सुरक्षा दल आणि केंद्रीय राखील सुरक्षा दलाच्या जवानांना तैनात करण्यात आले होते. कोणत्याही ठिकाणी निदर्शने करण्यात आली नाहीत किंवा निषेधाच्या फेऱ्याही निघाल्या नाहीत, असे सांगण्यात आले. उत्तर प्रदेशातही सर्व व्यवहार सुरळीत असून, कोणताही अनुचित प्रकार घडला नसल्याची माहिती पोलिसांनी दिली.