समाजवादी पक्षाशी आघाडीची काँग्रेसची घोषणा

मटा ऑनलाइन वृत्त । लखनऊ

बिहारच्या धर्तीवर उत्तर प्रदेशात महाआघाडी स्थापन करण्याच्या हालचालींना वेग आला असून काँग्रेसनं अखिलेश यादव यांच्या नेतृत्वाखालील समाजवादी पक्षाशी आघाडी करण्याची एकतर्फी घोषणा करून टाकली आहे. अखिलेश यादव यांनी मात्र, येत्या एक-दोन दिवसांत याबाबत निर्णय घेतला जाईल, अशी प्रतिक्रिया दिली आहे.

लोकसभेतील विजयानंतर देशातील काही राज्य काँग्रेसकडून हिसकावणाऱ्या केंद्रातील सत्ताधारी भाजपनं देशातील सर्वात मोठं राज्य ताब्यात घेण्यासाठी जोरदार मोर्चेबांधणी केली आहे. मात्र, भाजपला आणखी एक राज्य मिळू नये यासाठी काँग्रेसनंही कंबर कसली आहे. उत्तर प्रदेशात काँग्रेसची स्थिती अत्यंत दयनीय आहे. सर्वात आधी प्रचाराचा नारळ फोडून आणि प्रशांत किशोर यांच्यासारखे कथित राजकीय 'चाणक्य' मदतीला घेऊनही काँग्रेसला यूपीच्या जनतेकडून प्रतिसाद मिळेनासा झाला आहे. त्यामुळं काँग्रेसनं समाजवादी पक्षाशी आघाडी करून जास्तीत जास्त जागा पदरात पाडून घेण्याची रणनीती आखली आहे. मात्र, सपातील अंतर्गत यादवीमुळं आघाडीच्या हालचाली मंदावल्या होत्या.

निवडणूक आयोगानं समाजवादी पक्षावर अखिलेश यांचा हक्क मान्य केल्यानंतर काँग्रेसनं लगेचच पुन्हा आघाडीच्या हालचाली सुरू केल्या. यूपीच्या मुख्यमंत्रिपदाच्या उमेदवार म्हणून जाहीर केलेली शीला दीक्षित यांची उमेदवारी मागे घेण्याची तयारी दर्शवली. त्याही पुढं जाऊन आज काँग्रेसनं सपाशी आघाडी करण्याचा एकतर्फी निर्णयच जाहीर करून टाकला. ही आघाडी नेमकी कशी असेल, त्यात कोण किती जागा लढवेल, अजित सिंह यांचा राष्ट्रीय लोकदल आघाडीचा भाग असेल काही नाही हे मात्र स्पष्ट झालेलं नाही.