कामत यांचा काँग्रेसमधील सर्व पदांचा राजीनामा

मटा ऑनलाइन वृत्त । नवी दिल्ली

दोन महिन्यांपूर्वी झालेल्या मुंबई महापालिका निवडणुकीच्या वेळी बंडाचा झेंडा उगारून काँग्रेसला धक्का देणारे माजी खासदार गुरुदास कामत यांची गुजरात काँग्रेसच्या प्रभारीपदावरून उचलबांगडी करण्यात आली आहे. कामत यांच्या जागी आता राजस्थानचे माजी मुख्यमंत्री अशोक गेहलोत यांची नियुक्ती करण्यात आली आहे. दरम्यान, कामत यांनी पक्षाच्या सर्व पदांचा राजीनामा दिला आहे.

येत्या डिसेंबरमध्ये गुजरातमध्ये विधानसभा निवडणुका होणार आहेत. पंतप्रधान नरेंद्र मोदी यांचा गड असलेल्या गुजरातमधील निवडणुका काँग्रेसच्या राजकीय वाटचालीच्या दृष्टीनं अत्यंत महत्त्वाच्या आहेत. त्या पार्श्वभूमीवर काँग्रेसनं संघटनात्मक बांधणी सुरू केली आहे. त्याचाच भाग म्हणून कामत यांच्याकडून ही जबाबदारी काढून घेण्यात आली आहे. त्यांच्याऐवजी ज्येष्ठ नेते गेहलोत यांच्यावर ही जबाबदारी देण्यात आली आहे. त्यांच्या टीममध्ये हिंगोलीचे खासदार राजीव सातव, धारावीच्या आमदार वर्षा गायकवाड, बुलढाण्याचे आमदार हर्षवर्धन सकपाळ आणि मध्य प्रदेशातील आमदार जितू पटवारी यांचा समावेश आहे.

कामत म्हणतात, सगळं काही मागणीनुसार

गुरुदास कामत यांनी या निर्णयाचं स्वागत केलं आहे. 'मला पक्षातील सर्व जबाबदाऱ्यांतून मुक्त करावं, अशी मागणी मी स्वत: दोनवेळा राहुल गांधी यांच्याकडं केली होती. पक्षाध्यक्ष सोनिया गांधी यांनाही तसं पत्र लिहिलं होतं. गेल्याच आठवड्यात राहुल गांधी यांच्याशी या संदर्भात भेट घेऊन मी चर्चाही केली होती,' असं कामत यांनी म्हटलं आहे.