जीएसटी म्हणजे 'गई सेव्हिंग तुम्हारी'!

मटा ऑनलाइन वृत्त । नवी दिल्ली

काँग्रेस उपाध्यक्ष राहुल गांधी विदेशातून मायदेशी परतताच काँग्रेसने जीएसटी विरोध अधिक तीव्र केला असून जीएसटीचा खरा अर्थ 'गई सेव्हिंग तुम्हारी' असा असल्याची तोफ काँग्रेस प्रवक्ते अजय माकन यांनी आज एका पत्रकार परिषदेत डागली आहे.

जीएसटीमधून सरकार अधिक टॅक्स वसूल करत आहे, अशी टीका करताना एलपीजी जीएसटीच्या कक्षेत आणण्यास माकन यांनी विरोध केला. सरकार एकीकडे एलपीजीवर नफा कमावणार आहे आणि दुसरीकडे गृहिणींवर जीएसटीचा बोजा टाकण्यात आला आहे, असे माकन पुढे म्हणाले.

माकन यांनी यावेळी भारत-चीन सीमेवरील तणाव आणि पंतप्रधान नरेंद्र मोदी यांच्या विदेश दौऱ्यांवरूनही टीका केली. चीनचे सैनिक भारतीय हद्दीत घुसखोरी करत असताना आपलं सरकार मात्र सुस्त आहे, असे माकन म्हणाले. पंतप्रधानांचे विदेश दौरे व्यर्थ आहेत. पंतप्रधानांचा हा ६५ वा दौरा आहे मात्र जगभरात फिरूनही काहीच हाती लागलेलं नाही. त्याउलट शेजारी देशांशी आपले संबंध अधिक बिघडत चालले आहेत, असे माकन म्हणाले.