काँग्रेसचे आज ‘जन-वेदना संमेलन’

म. टा. विशेष प्रतिनिधी, नवी दिल्ली

पंतप्रधान नरेंद्र मोदी यांनी जाहीर केलेल्या नोटाबंदीच्या निषेधार्थ दिल्लीच्या तालकातोरा इनडोअर स्टेडियममध्ये आज, बुधवारी काँग्रेसचे ‘जन-वेदना संमेलन’ आयोजित करण्यात आले आहे. काँग्रेस अध्यक्ष सोनिया गांधी यांच्या अनुपस्थितीत या राष्ट्रीय संमेलनाचे अध्यक्षपद पक्षाचे उपाध्यक्ष राहुल गांधी भूषविणार आहेत. सोनिया गांधी यांच्याकडून काँग्रेस अध्यक्षपदाची सूत्रे राहुल गांधींकडे सोपविली जाण्याची ही पूर्वतयारी मानली जात आहे.

विदेशवारीसाठी रवाना झालेले राहुल गांधी मंगळवारी दहा दिवसांनंतर भारतात परतले. दिल्लीत परतताच पंजाब आणि उत्तर प्रदेशच्या विधानसभा निवडणुकांची रणनिती निश्चित करण्यासाठी काँग्रेस अध्यक्ष सोनिया गांधी, पंजाब प्रदेश काँग्रेसचे अध्यक्ष कॅप्टन अमरिंदर सिंग आणि प्रियंका गांधी वढेरा यांच्या उपस्थितीत बैठकी झाल्या. उत्तर प्रदेशातही अखिलेश यादव यांच्या गटासोबतही काँग्रेसच्या हातमिळवणीचा इरादा आहे. या पार्श्वभूमीवर आज तालकातोरा स्टेडियममध्ये सकाळी दहा वाजतापासून सायंकाळी ४ वाजेपर्यंत चालणाऱ्या या संमेलनात नोटाबंदीवर चर्चा होणार असून त्यात राहुल गांधी, माजी पंतप्रधान डॉ. मनमोहन सिंग यांच्यासह काँग्रेसचे सर्व ज्येष्ठ नेते आणि काँग्रेस कार्यकारिणीतील सदस्य सहभागी होणार आहेत.