Congress Fast: नेत्यांचा छोले-भटुऱ्यांवर ताव

नवी दिल्ली: देशभरात दलितांवर होणाऱ्या अत्याचाराच्याविरोधात एक दिवसाचं लाक्षणिक उपोषण करणाऱ्या काँग्रेस नेत्यांची पोलखोल झाली आहे. उपोषणापूर्वी काँग्रेसचे नवी दिल्ली प्रदेशाध्यक्ष अजय माकन यांच्यासह काँग्रेसच्या इतर नेत्यांनी येथील एका हॉटेलमध्ये छोले-भटुऱ्यांवर मनसोक्त ताव मारल्याचं समोर आलं आहे. त्याचे फोटोही व्हायरल झाल्याने काँग्रेसचं उपोषण केवळ दिखावा असल्याचं बोललं जात आहे.

येत्या १२ एप्रिल रोजी होणाऱ्या भाजपच्या उपोषणाला प्रत्युत्तर देण्यासाठी काँग्रेस अध्यक्ष राहुल गांधी यांनी दलित अत्याचाराच्या विरोधात आज एक दिवसीय लाक्षणिक उपोषण पुकारण्याची हाक दिली होती. त्यानुसार देशभरात काँग्रेसच्या कार्यकर्त्यांनी उपोषणही सुरू केलं आहे. स्वत: राहुल गांधी यांनी राजघाटावरील महात्मा गांधी यांच्या स्मृतीस्थळाजवळ बसून उपोषण सुरू केलं आहे. मात्र दिल्लीतील काँग्रेसचे नेते भरपेट खाऊन उपोषणाला बसल्याचं उघड झालं आहे.

नवी दिल्लीचे माजी मुख्यमंत्री मदनलाल खुराणा यांचे चिरंजीव आणि भाजपचे नेते हरीश खुराणा यांच्या ट्विटरवर काँग्रेसच्या या नेत्यांचे छोले-भटुरेवर ताव मारतानाचे फोटो पोस्ट केलेले आहेत. त्यात काँग्रेस नेते अजय माकन यांच्यासह हारून युसूफ आणि अरविंद सिहं लवली छोले-भटुरे खाताना दिसत आहेत. भाजपचे दिल्ली प्रदेशाध्यक्ष मनोज तिवारी यांनीही खुराणा यांचं हे ट्विट रिट्विट केलं आहे. 'हा उपवास आहे की उपहास? तीन तासही उपाशी राहू शकत नाहीत का?,' असा टोला तिवारी यांनी काँग्रेसला हाणला आहे.


दरम्यान, काँग्रेस नेते अरविंद सिंह लवली यांनी उपोषणापूर्वी भटुरे खाल्ल्याचं मान्य केलं आहे. सकाळी ८ वाजताचे हे फोटो आहेत, असं सांगतानाच 'हे उपोषण संपूर्ण दिवसभरासाठी नव्हतं. हे केवळ प्रतिकात्मक उपोषण होतं. सकाळी १०.३० वाजल्यानंतर उपोषण सुरू होणार होतं, त्यामुळे त्यात काही विशेष नाही,' असं लवली यांनी सांगितलं.