'भाजपमध्ये या', काँग्रेस आमदाराला ५० कोटी आणि मंत्रीपदाची ऑफर!

धार, मध्य प्रदेशः मध्य प्रदेशातील कमलनाथ सरकारमध्ये मंत्री असलेले कॉंग्रेसचे आमदार उमंग सिंघार ( umang singhar ) यांनी भाजपचे खासदार ज्योतिरादित्य शिंदे ( jyotiraditya scindia ) यांच्यावर गंभीर आरोप केले आहेत. ज्योतिरादित्य शिंदे यांनी भाजपमध्ये प्रवेश करण्यासाठी ५० कोटी रुपये आणि मंत्रीपदाची ऑफर दिली होती, असं उमंग सिंघार म्हणाले. कॉंग्रेस नेत्याच्या आरोपानंतर राज्याच्या राजकारणात खळबळ उडाली आहे. ज्योतिरादित्य शिंदे आता कॉंग्रेसच्या निशाण्यावर आले आहेत. ज्योतिरादित्य शिंदे यांनी या आरोपांना उत्तर द्यावं, असं माजी मुख्यमंत्री आणि पक्षाचे ज्येष्ठ नेते दिग्विजय सिंह ( digvijay singh ) म्हणाले.

उमंग सिंघार हे ज्योतिरादित्य शिंदे यांचे खास होते. यामुळे ज्योतिरादित्य शिंदे यांनी या आरोपांवर स्पष्टीकरण द्यावं. ज्योतिरादित्य शिंदे यांनी उमग सिंघार सत्य बोलतं आहेत की खोटं हे स्पष्ट करायला हवं, असं बदनावरमधील सभेत दिग्विजय सिंह म्हणाले.

दिग्विजय सिंह यांनी मध्य प्रदेशचे मुख्यमंत्री शिवराजसिंह चौहान यांनाही लक्ष्य केलं. शिवराजसिंह चौहान यांनी अटलबिहारी वाजपेयी यांच्याकडून शिकलं पाहिजे. त्यांनी एका मताने सरकार पडण्याला पसंती दिली. ते एक सिद्धांतवादी होते, असं दिग्विजय सिंह म्हणाले.

'हो, मी जनतेचा कुत्रा आहे याचा मला अभिमान आहे!'

'सगळं उघड केलं ना, तर काँग्रेसला तोंड दाखवणंही अवघड होईल'

उमंग सिंघार काय म्हणाले?

उमंग सिंघार यांनी ज्योतिरादित्य शिंदेंवर गंभीर आरोप केल्याने राज्यातील राजकारण तापलं आहे. ज्योतिरादित्य शिंदे यांनी भाजपमध्ये येण्यासाठी ५० कोटी रुपये आणि मंत्रीपदाची ऑफर दिली होती. आपल्यासाठी तत्व महत्वाची आहेत. पद नाही, असं त्यावेळी शिंदेंना आपण सांगतिल्याचं उमंग सिंघार म्हणाले.

कॉंग्रेसमध्ये कोणतेही भविष्य नाही, असं ज्योतिरादित्य शिंदे आपल्याला म्हणाले. तुमच्या आर्थिक परिस्थितीसंदर्भात आम्ही तुमच्यासाठी ५० कोटींची व्यवस्था करू. आपलं भाजपशी बोलणं झालं आहे. ते तुम्हाला मंत्रिपदही देत आहेत, उमंग सिंघार यांनी सांगितलं.