शंकरसिंह वाघेलांचा काँग्रेसला रामराम

मटा ऑनलाइन वृत्त । अहमदाबाद

काँग्रेस नेतृत्वावर नाराज असलेले व गेल्या काही दिवसांपासून भाजपच्या वाटेवर असलेले गुजरात काँग्रेसचे दिग्गज नेते व माजी मुख्यमंत्री शंकरसिंह वाघेला यांनी आज काँग्रेस सोडण्याची घोषणा केली. लवकरच होऊ घातलेल्या गुजरात विधानसभा निवडणुकीच्या पार्श्वभूमीवर वाघेला यांचा हा निर्णय काँग्रेससाठी मोठा झटका मानला जात आहे. तर, सत्ताविरोधी लाटेचा सामना करणाऱ्या भाजपसाठी हा दिलासा मानला जात आहे.

वाढदिवसानिमित्त आयोजित कार्यक्रमात वाघेला यांनीच ही घोषणा केली. 'मी आधीच विरोधी पक्ष नेतेपदाचा राजीनामा दिला आहे. राज्यसभा निवडणुकीनंतर आमदारकीचाही राजीनामा देणार आहे. मी आता कोणत्याही पक्षाचा गुलाम राहिलेलो नाही. आता मी आझाद पंछी आहे,' असं त्यांनी यावेळी सांगितलं. यावेळी वाघेला यांनी काँग्रेस अध्यक्षा सोनिया गांधी व उपाध्यक्ष राहुल गांधी यांच्यावरही जोरदार टीका केली.

येत्या विधानसभा निवडणुकीत काँग्रेसनं आपल्याला मुख्यमंत्रिपदाचा चेहरा म्हणून घोषित करावं, अशी वाघेला यांची मागणी होती. मात्र, काँग्रेस हायकमांडनं त्यांना फारसा प्रतिसाद दिला नाही. वाघेला यांना मुख्यमंत्रिपदाचा उमेदवार म्हणून पुढं केल्यास मूळचे काँग्रेसी नाराज होतील, असं पक्षाकडून त्यांना सांगण्यात आलं होतं. त्यामुळं वाघेला नाराज होते. अधूनमधून ते काँग्रेसच्या कारभारावर तोफाही डागत होते.

भाजपाध्यक्ष अमित शहा यांनी वाघेला यांची ही तगमग ओळखून त्यांना पुन्हा स्वगृही आणण्याचे प्रयत्न सुरू केले होते. त्यामुळं वाघेला पुन्हा भाजपमध्ये परतणार, अशी चर्चा होती. मात्र, मी कोणत्याही पक्षात जाणार नसल्याचं त्यांनी आज स्पष्ट केलं. त्यामुळं ते नेमकं काय करणार, याबाबत तर्कवितर्क लढवले जात आहेत.