पवारांना शह देण्यासाठी काँग्रेसचे 'सोनिया कार्ड'

नवी दिल्ली:

केंद्रातील सत्ताधारी भाजपविरोधात विरोधी पक्षांच्या एकजुटीसाठी प्रयत्न करणारे राष्ट्रवादी काँग्रेसचे अध्यक्ष शरद पवार यांना शह देण्यासाठी काँग्रेसनं 'चाल' खेळली आहे. सोनिया गांधी यांच्या नेतृत्वाखाली विरोधकांची एकजूट करण्याची योजना काँग्रेसकडून आखण्यात येत आहे. विशेष म्हणजे पवार यांनी गेल्या चार दिवसांत विरोधी पक्षांच्या नेत्यांसोबत दोन बैठका घेतल्यानंतर काँग्रेसनं हे पाऊल उचललं आहे.

काँग्रेसचे वरिष्ठ नेते गुलाम नबी आझाद आणि आनंद शर्मा हे पवार यांच्या दिल्लीतील निवासस्थानी झालेल्या विरोधी पक्षांच्या बैठकीत सहभागी झाले होते. या दोन्ही नेत्यांनी चलाखीनं सोनिया गांधी यांच्या नेतृत्वाखाली विरोधी पक्षांची एकजूट घडवून आणण्याचा प्रस्ताव ठेवला. त्यावर पुढील आठवड्यात सोनियांच्या नेतृत्वाखाली प्रमुख विरोधी पक्षांची एक बैठक घेण्यावर सगळ्यांनीच सहमती दर्शवली.

काँग्रेसचं नेतृत्व औपचारिकरित्या राहुल गांधी यांच्याकडे असलं तरी सोनिया गांधी या पक्षाच्या मार्गदर्शक असतील, असं काँग्रेसच्या नेत्यांनी स्पष्ट केलं. दरम्यान, पवार यांच्या निवासस्थानी झालेल्या या बैठकीत तृणमूल काँग्रेस, बसप, डीएमके, समाजवादी पक्ष सहभागी झाले नाहीत.