'सीडीएस' रावत यांच्या नियुक्तीवर काँग्रेसचा आक्षेप

नवी दिल्लीः देशाचे पहिले चिफ ऑफ डिफेन्स स्टाफ (सीडीएस) म्हणून जनरल बिपीन रावत यांची नियुक्ती करण्यात आली असून, या नियुक्तीवर काँग्रेसने आक्षेप घेतले आहेत. केंद्रातील मोदी सरकारने हे नवे पद निर्माण केले आहे.

वैचारिक बैठक एकसारखी असल्यामुळे बिपीन रावत यांची सीडीएस पदी नियुक्ती करण्यात आल्याचा आरोप काँग्रेसकडून करण्यात आला आहे. केंद्र सरकारने केलेल्या या नियुक्तीवर अनेक प्रश्न काँग्रेसकडून उपस्थित करण्यात आले आहेत. लष्करप्रमुख असतानाही काँग्रेसने बिपीन रावत यांच्यावर अनेकदा आरोप केले होते. बिपीन रावत रस्त्यावर गुंड आहेत, अशी टीकाही एका काँग्रेस नेत्याने यापूर्वी केली होती.

अखेर बिपीन रावत यांची सीडीएस म्हणून नियुक्ती करण्यात आली. त्यांची वैचारिक बैठक आणि त्यांची सेवा लक्षात घेऊनच केंद्र सरकारने त्यांची नियुक्ती केली असावी. भारतीय लष्कर ही राजकीय संस्था नाही. जाती-धर्मापलीकडे जाऊन भारतीय सैन्याचा आम्हाला अभिमान आहे, असे काँग्रेसचे लोकसभेतील विरोधी पक्षनेते अधीर रंजन चौधरी यांनी म्हटले आहे. बिपीन रावत यांची वैचारिक बैठक काही असली, तरी त्याचा परिणाम लष्करी कामावर पडायला नको, असेही चौधरी यांनी म्हटले आहे.

२०१९ मध्ये निधन पावलेले दिग्गज राजकारणी


सीडीएस संदर्भात केंद्र सरकारने घेतलेला पहिला निर्णय पूर्णपणे चुकीचा आहे. पूर्ण जबाबदारीने हे वक्तव्य करत आहे, असे ट्विट काँग्रेस नेते मनीष तिवारी यांनी केले आहे. भारतीय सैन्याच्या तीनही प्रमुखांकडून मिळणाऱ्या सूचनेपेक्षा वेगळी सूचना किंवा सल्ला सीडीएस सरकारला देणार आहेत का, सैन्याच्या तीनही संरक्षण सचिवांऐवजी आता सीडीएस संरक्षण मंत्र्यांना अहवाल सादर करणार का, केंद्र सरकारचा हा निर्णय अनेक प्रश्न निर्माण करतो, अशी टीकाही तिवारी यांनी यावेळी केली.

मनोज नरवणे यांनी लष्करप्रमुखपदाचा पदभार स्वीकारला


दरम्यान, कारगिल युद्धानंतर तिन्ही सैन्य दलामध्ये ताळमेळ बसवण्यासाठी सीडीएस या पदाची मागणी करण्यात आली होती. पंतप्रधान नरेंद्र मोदी यांनी या वर्षीच्या १५ ऑगस्ट रोजीच्या लाल किल्ल्यावरून केलेल्या भाषणात या पदाची घोषणा केली होती. जवळपास चार महिन्यांच्या प्रक्रियेनंतर जनरल रावत यांची या पदावर नियुक्ती करण्यात आली आहे. २४ डिसेंबर रोजी झालेल्या केंद्र सरकारच्या कॅबिनेट बैठकीत या संदर्भात निर्णय घेतला गेला, अशी माहिती एका वरिष्ठ अधिकाऱ्याने दिली. बिपीन रावत यांची जबाबदारी वाढली असून, ते आता लष्कर, वायूदल आणि नौदलसह संरक्षण मंत्रालय आणि पंतप्रधान कार्यालयाच्या नेतृत्वाखालील न्यूक्लिअर कमांड अ‍ॅथॉरिटीला सल्ला देण्याचे काम करणार आहेत.