शेतकरी डिजिटल पेमेंट करतात का?

मटा ऑनलाइन वृत्त । नवी दिल्ली

'शेतकरी डिजिटल पेमेंट करतात का?', असा तिरकस सवाल करत काँग्रेस उपाध्यक्ष राहुल गांधी यांनी आज गुजरातमधून पंतप्रधान नरेंद्र मोदी यांच्यावर जोरदार निशाणा साधला. मोदी सरकारने केलेल्या चुकांमुळे सामान्य जनतेला प्रचंड मनस्ताप सहन करावा लागत आहे, असा आरोपही राहुल यांनी केला.

मोदी सरकारने जो नोटाबंदीचा निर्णय घेतला त्यामुळे दबलेल्या-पिचलेल्या आणि तळागाळातल्या लोकांना मोठा फटका बसला. शेतकरी वर्ग डिजिटल पेमेंट करू शकत नाही. तो आजही रोखीनेच आपले व्यवहार करत आहे. सरकारच्या नोटाबंदीच्या निर्णयाने तो मेटाकुटीला आला आहे, असे राहुल म्हणाले.

नरेंद्र मोदी यांनी कुणालाही न विचारता भारतीय अर्थव्यवस्थेवर मोठे आक्रमण केले आहे. ते तेवढ्यावरच थांबले नाहीत तर त्यांनी नोटाबंदी लादून छोटे दुकानदार आणि व्यापाऱ्यांचे कंबरडे मोडले आहे. त्यानंतर जीएसटीचीही भर घालण्यात आली आहे, अशा शब्दांत राहुल यांनी मोदी सरकारवर तोफ डागली.

राहुल यांनी 'गुजरात मॉडेल'चीही यावेळी खिल्ली उडवली. गुजरात मॉडेलमधून केवळ कार्पोरेट क्षेत्राला लाभ मिळत आहे. यात जमीन, वीज यासारख्या सर्व सुविधा कार्पोरेट कंपन्यांना पुरवल्या जात आहेत. त्याचवेळी गरिबांच्या हाती मात्र काहीही लागत नाहीय, अशी टीका राहुल यांनी केली.

द्वारकाधीशाच्या दर्शनाने दौऱ्याची सुरुवात

आगामी गुजरात विधानसभा निवडणुकीच्या पार्श्वभूमीवर राहुल गांधी आजपासून तीन दिवसांच्या गुजरात दौऱ्यावर आहेत. पाटीदार बहुल सौराष्ट्रमधून राहुल यांनी दौऱ्याची सुरुवात झाली. सर्वप्रथम त्यांनी द्वारका येथील द्वारकाधीश मंदिरात जाऊन दर्शन घेतले. त्यानंतर ते ठिकठिकाणी शेतकरी, मजूर आणि तळागाळातील लोकांशी संवाद साधत आहेत. पहिल्या टप्प्यात ते ४५० किलोमीटरचं अंतर कापणार आहेत. दरम्यान, राहुल यांचं आज गुजरातमध्ये आगमन होताच पाटीदार आरक्षण आंदोलनाचा नेता हार्दिक पटेलने ट्विटरच्या माध्यमातून राहुल यांचे स्वागत केल्याने अनेकांच्या भुवया उंचावल्या आहेत.