पंजाबमध्ये काँग्रेसचा दणदणीत विजय

मटा ऑनलाइन वृत्त । चंदीगड

मोदी सरकारच्या कारभाराविरोधात देशभरात विरोधाचे आवाज उमटत असतानाच पंजाबमध्ये काँग्रेसनं दिवाळीआधीच धमाका करत भाजपला जोरदार धक्का दिला आहे. अभिनेते, खासदार विनोद खन्ना यांच्या निधनामुळं रिक्त झालेल्या पंजाबमधील गुरुदासपूर लोकसभा पोटनिवडणुकीत काँग्रेसनं भाजपचा दणदणीत पराभव केला आहे. काँग्रेसच्या सुनील जाखड यांनी थोड्याथोडक्या नव्हे तब्बल १ लाख ९३ हजार २१९ मतांच्या फरकानं भाजपच्या उमेदवाराला धूळ चारली आहे.

विनोद खन्ना यांच्या रिक्त जागेसाठी ११ ऑक्टोबर रोजी निवडणूक झाली होती. भाजप-अकाली दल युतीचे स्वर्ण सलारिया व आम आदमी पक्षाकडून मेजर जनरल (निवृत्त) सुरेश खजुरिया यांनी निवडणूक लढवली. ही लढत तिरंगी होईल असे वाटत होते. मात्र, प्रत्यक्षात काँग्रेस व भाजपच्या उमेदवारामध्येच चुरस होती. त्यातही काँग्रेसच्या उमेदवारापुढं भाजपचा टिकाव लागला नाही. मतमोजणीच्या प्रत्येक टप्प्यात भाजपचे सलारिया अधिकाधिक फरकानं पीछाडीवर पडत गेले व अखेर त्यांच्या पराभवावर शिक्कमोर्तब झाले. 'आप'चे खजुरिया तिसऱ्या स्थानावर फेकले गेले.

पंजाबचे मुख्यमंत्री कॅप्टन अमरिंदर सिंग यांनी ट्विट करून जाखड यांचं अभिनंदन केलं. 'हा विजय म्हणजे काँग्रेसच्या पुनरुज्जीवनाच्या प्रक्रियेतील महत्त्वाचा टप्पा आहे. २०१९च्या लोकसभेसाठी पक्ष सज्ज होत असल्याचं हे द्योतक आहे,' असं कॅप्टन यांनी म्हटलं आहे.

केरळमध्येही काँग्रेस

केरळमधील वेंगारा विधानसभा पोटनिवडणुकीत सत्ताधारी डाव्या आघाडीला पराभवचा धक्का बसला आहे. तिथंही काँग्रेसच्या नेतृत्वाखालील युनायटेड डेमोक्रॅटिक फ्रंटनं (यूडीएफ) विजय मिळवला आहे. यूडीएफच्या केएनए कादेर यांनी डाव्या आघाडीच्या उमेदवाराला धूळ चारली. केरळमध्ये शिरकावासाठी प्रयत्नांची पराकाष्ठा करणाऱ्या भाजपला चौथ्या स्थानावर समाधान मानावे लागले.