बिस्किटाचं वजन कमी ;ब्रिटानियाला ३१ हजारांचा दंड

अहमदाबाद:

महाराष्ट्र टाइम्स.कॉम

बिस्किटाच्या पाकिटात कमी बिस्किटं असल्यानं ब्रिटानिया कंपनीला ग्राहक कोर्टानं ३१ हजार रुपयांचा दंड ठोठावला आहे. या प्रकरणात२५ हजार रूपये ग्राहक कल्याण निधीसाठी तर तक्रार केलेल्या ग्राहकाची फसवणूक झाल्यानं सहा हजार रुपये नुकसान भरपाई देण्याचे आदेश अहमदाबाद ग्राहक न्यायालयानं दिले आहेत.

नगरपुरा येथील रहिवासी लालजीभाई पटेल यांनी जुलै २०१२मध्ये ब्रिटानिया मेरी गोल्ड बिस्किटाची सहा पाकिटं विकत घेतली होती. पाकिटावर बिस्किटाचं वजन १२२.५ ग्राम असल्याचं लिहिण्यात आलं होतं. लालजीभाई यांना पाकिटावर नमूद केलेल्या वजनापेक्षा बिस्किटांच्या पाकिटाचं वजन कमी असल्याचं लक्षात आलं.
यानंतर लालजीभाई यांनी आईएसओ ९००१ प्रयोग शाळेत या बिस्किटांच्या पाकिटांचे वजन केलं. बिस्किटाच्या पाकिटांचे वजन १०४ ग्राम वजनानं कमी असल्याचं स्पष्ट झालं. यानंतर लालजीभाई यांनी अहमदाबादच्या ग्राहक न्यायालय ब्रिटानिया कंपनीविरोधात तक्रार दाखल केली.

ब्रिटानिया कंपनीनं बिस्किटांचं उत्पादन आणि पॅकेजींग स्वयंचलित मशिनीद्वारे केलं जात असल्यानं वजनात तफावत आल्याचं सांगितलं. तसेच ब्रिटानिया ही एक ९० वर्ष जुनी कंपनी असून हा एक मोठा ब्रॅन्ड असल्याचं कंपनीनं स्पष्टीकरण देताना म्हटंल. पण ७ते८ टक्के कमी वजन असल्यानं ही ग्राहकांची फसवणुक असल्याचं म्हणत कोर्टानं कंपनीला ३१ हजार रुपयांचा दंड ठोठावला.