आयसीयूमध्ये डॉक्टरांच्या मदतीला स्वयंपाकी

लखनऊ:

उत्तर प्रेदश सरकारचा आरोग्य विभाग केजीएमयू रुग्णालयातील रुग्णांच्या जीवाशी खेळत असल्याचा धक्कादायक प्रकार उघडकीस आला आहे. लखनऊतील केजीएमयू रुग्णालयातील ऑपरेशन थिएटर, आयसीयू, क्रिटिकल केअर युनिटमध्ये डॉक्टरांच्या मदतीसाठी चक्क स्वयंपाकी नियुक्त केले आहेत. त्यांना कोणत्याही प्रकारचं प्रशिक्षण देण्यात आलं नाही.

गेल्या तीन महिन्यांत १० स्वयंपाकी केजीएमयूच्या विविध विभागांमध्ये तैनात करण्यात आल्याची माहिती केजीएमयूमधील कर्मचारी संघानं दिली आहे. शस्त्रक्रियांसाठी वापरण्यात येणाऱ्या उपकरणांची स्वच्छता, रुग्णांना मलमपट्टी करणं तसंच आयसीयूमधील रुग्णांची देखभाल करणे आदी कामे या स्वयंपाकी कर्मचाऱ्यांना करावी लागतात. मात्र, त्यांना अशा प्रकारच्या कामांचं कोणतंही प्रशिक्षण दिलं नाही. कर्मचारी संघानं याविरोधात आवाज उठवला आहे. आयसीयूसह महत्त्वाच्या विभागांमध्ये नियुक्त केलेल्या स्वयंपाकींना वैद्यकीय उपकरणे स्वच्छ करता येत नाहीत. तशी तक्रार त्यांनी कर्मचारी संघाकडे केली आहे. डॉक्टरांनी सांगितल्यानंतर उपकरणांची स्वच्छता करतो, पण अनेकदा त्यावरील रक्ताचे डाग तसेच राहतात असं स्वयंपाकींचं म्हणणं असल्याचं कर्मचारी संघानं सांगितलं. 'स्वयंपाकींची विविध विभागांमध्ये चतुर्थ श्रेणी कर्मचारी म्हणून नियुक्ती केली होती. त्यांना आयसीयूमध्ये कामे करावी लागतात, अशी तक्रार संघटनेनं केली आहे. याबाबत वरिष्ठांशी बोलू', असे केजीएमयूच्या निबंधकांनी सांगितले.