महाराष्ट्र... एक कोटी नागरिकांचं लसीकरण पूर्ण करणारं देशातील पहिलं राज्य!

सोमवारपर्यंत महाराष्ट्रात तब्बल १,००,९९,५२४ व्यक्तींचे करोना लसीचे दोन्ही डोस पूर्ण झाले आहेत. महाराष्ट्रातील एकूण ८.५ कोटी वयस्क लोकसंख्येपैंकी १२ टक्के नागरिकांना लसीचे दोन्ही डोस मिळाले आहेत. तर २५ टक्के नागरिकांना करोना लसीचा कमीत कमी एक डोस मिळाला आहे.

भारतात एव्हाना नऊ कोटींहून अधिक लोकांचे करोना लसीकरणाचे दोन्ही डोस पूर्ण झाले आहेत. यातील एक कोटी नागरिक केवळ महाराष्ट्रातील आहेत.

राज्यात लसीकरण मोहीम १६ जानेवारीपासून सुरू झाली होती. यावेळी २३० केंद्रांवर लसीकरणाची सुविधा उपलब्ध होती. सध्या महाराष्ट्रात ४१०० लस केंद्र कार्यरत आहेत.

महाराष्ट्रात अनेक ठिकाणी उद्भवलेल्या पूर परिस्थितीमुळे ट्रान्सपोर्ट सेवेसहीत लसीकरण मोहिमेलाही फटका बसल्याचं राज्याचे अतिरिक्त आरोग्य सचिव प्रदीप व्यास यांनी म्हटलंय. उदाहरण द्यायंच झालं तर रत्नागिरीत काल ४०० हून कमी नागरिकांचं लसीकरण झालं. परंतु, पूरस्थितीतही रायगडमध्ये ८००० हून अधिक जणांचं लसीकरण करण्यात आलं. यासाठी राज्याचे मुख्यमंत्री उद्धव ठाकरे आणि आरोग्य मंत्री राजेश टोपे यांनी आरोग्य विभागाचं कौतुक केलंय.

राज्यात सर्वाधिक ४५ वर्षांहून अधिक वयोगटातील ७४.२८ लाख नागरिकांना करोना लसीचे दोन्ही डोस मिळाले आहेत. तर १.०१ कोटी नागरिकांना कमीत कमी एक डोस देण्यात आला आहे.

१८ ते ४४ वयोगटातील ४५ लाख नागरिकांना दोन्ही डोस तर ९९.५६ लाख नागरिकांना करोना लसीचा एक डोस देण्यात आला आहे.

राज्यात ८.९७ आरोग्य कर्मचाऱ्यांना करोना लसीचे दोन्ही डोस तर ३.८८ लाख कर्मचाऱ्यांना एक डोस मिळालाय.

राज्यात ११ लाख करोना योद्ध्यांना दोन्ही डोस मिळालेत तर १० लाख योद्ध्यांनी आपला करोना लसीचा पहिला डोस घेतला आहे.

महाराष्ट्रात पुणे जिल्ह्यात सर्वाधिक अर्थात ५९.१२ लाख नागरिकांचं लसीकरण पूर्ण झालंय.

तर दुसरीकडे उत्तर प्रदेशात एव्हाना ४.५२ कोटी नागरिकांना कमीत कमी एक लस देण्यात आलीय. यातील केवळ ७३ लाख नागरिकांना करोना लसीचे दोन्ही डोस मिळालेले आहेत.