देशात ६ दिवसांत करोना रुग्णांची संख्या दुप्पट

नवी दिल्ली: देशभरात करोनाची लागण झालेल्या रुग्णांची संख्या रविवारीच ९००० पर्यंत पोहोचली आहे. तर, मृतांची संख्या ३०० इतकी झाली आहे. केवळ रविवारी ७६३ रुग्ण वाढले असून ३९ रुग्णांचा मृत्यू झाला आहे. करोनामुळे महाराष्ट्राला सर्वाधिक फटका बसला असून दिल्लीत देखील ५ लोकांचा मृत्यू झाला आहे.

महाराष्ट्रात रुग्णसंख्या २००० वर

महाराष्ट्रात २२१ नवे रुग्ण आढळले असून २२ लोकांचा मृत्यू झाला आहे. एखाद्या राज्यात करोनाने मृत्यू होण्याचे हे प्रमाण देशातील कोणत्याही राज्यांमधील मृत्यूच्या प्रमाणाहून अधिक आहे.

अर्धा भारत करोनाग्रस्त

रविवारी रात्री उशिरा देशातील एकूण करोनाग्रस्तांची संख्या वाढून ती ९,१८८ वर पोहोचली आहे. यात ७६३ नवे रुग्ण आहेत, तर मृत्यू पावलेल्यांची संख्या ३२९ वर पोहोचली आहे. सूत्रांनी दिलेल्या माहितीनुसार, कोविड-१९ चा संसर्ग आता देशातील ३५० जिल्ह्यांमध्ये पसरलेला आहे. हा देशाचा ५० टक्के इतका भाग आहे. ६ एप्रिल या दिवशी देशात सुमारे ४७०० रुग्ण होते. तर गेल्या ६ दिवसांमध्ये ही संख्या दुप्पट झाली आहे. काही दिवसांपूर्वी ४.२ दिवसांमध्ये रुग्ण संख्या दुप्पट होईल असे सांगितले जात होते. त्यानुसार रुग्णसंख्या दुप्पट होण्याची गती काहीशी कमी झाल्याचे दिसत आहे.

दिल्लीतील परिस्थिती

दिल्लीत करोना रुग्णांची संख्या १,१५४ वर पोहोचली आहे, तर एकूण २४ जणांचा मृत्यू झाला आहे. रविवारी दिल्लीत ८५ नवे रुग्ण आझळले आहेत. रुग्णसंख्येचा विचार करता दिल्ली महाराष्ट्रानंतर दुसऱ्या स्थानी आहे.

तामिळनाडूत रुग्णसंख्या १००० पार, ८ डॉक्टरांनाही लागण

तामिळनाडूत १०६ नव्या रुग्णांची नोंद झाली असून एकूण रुग्णांची संख्या १०७५ वर पोहोचली आहे. नव्या रुग्णांमध्ये ८ उपचार करणाऱ्या डॉक्टरांचाही समावेश आहे, अशी माहिती तामिळनाडूच्या आरोग्य विभागाचे सचिव बीला राजेश यांनी सांगितले.

उत्तर प्रदेशाती रुग्ण झपाट्याने वाझत असून आग्रा हॉटस्पॉट बनला आहे. आग्र्यामध्ये १०४ रुग्ण आढळले. तर राजस्थानमध्ये रविवारी १०४ नव्या रुग्णांची नोंद झाली. राजस्थानात एकूण रुग्णसंख्या आहे ८०४.

कर्नाटकात १७ नवे रुग्ण आढळले असून राज्यातील हा दिवसाचा उच्चांक आहे. इथे एकूण रुग्ण आहेत २३२ इतके. आंध्र प्रदेशातही एकूण रुग्णसंख्या ४२० वर पोहोचली आहे. तेलंगणात रुग्णांची संख्या ५३१ वर पोहोचली आहे.

करोना Live: देशात रुग्णांची संख्या ९,००० वर; ३०० मृत्यू

केरळसाठी काहीशी दिलासा देणारी बातमी असून येथे रविवारी केवळ २ रुग्ण आढळले. तर ३६ रुग्ण बरे झाल्याचे घोषित करण्यात आले आहे. जम्मू-काश्मीरमध्ये २१ नवे रुग्ण आढळले असून एकूण रुग्णांची संख्या २४५ वर पोहोचली आहे.

लॉकडाउन: सध्या पॉर्न पाहण्यात भारतीय अव्वल

जीव वाचवण्याची संधी भारत दवडणार नाही: मोदी