coronavirus india : करोनाचा वाढता संसर्ग; पंतप्रधान कार्यालयात बैठक, महाराष्ट्रात करोनाचे दोन प्रकार

नवी दिल्ली: देशात करोना रुग्णांच्या वाढत्या संख्येच्या ( coronavirus ) पार्श्वभूमीवर पंतप्रधान कार्यालयात महत्वाची बैठक बोलवण्यात ( PMO ) आली आहे. केंद्रीय आरोग्य सचिव राजेश भूषण हेही या बैठकीला उपस्थित आहेत. देशातील काही राज्यांमध्ये, विशेषत: महाराष्ट्र आणि केरळमधील करोना रुग्णांची संख्या वेगाने वाढत असल्याच्या पार्श्वभूमीवर ही बैठक बोलवण्यात आली आहे. करोनाच्या वाढत्या प्रकरणांमुळे महाराष्ट्रातील ( coronavirus maharashtra ) काही शहरांमध्ये रात्रीची संचारबंदी जाहीर करण्यात आली आहे. रुग्ण वाढीचा वेग कायम राहिल्यास मुंबईत पुन्हा लॉकडाऊन करण्याची वेळ येऊ शकते. देशातील करोनाच्या वाढत्या रुग्णसंख्येमुळे प्रशासनाकडून मास्क न घालणाऱ्यांवर कडक कारवाई केली जात आहे. देशात काही काळापूर्वी करोनाच्या नवीन रुग्णांची संख्या १० हजारांच्या खाली आली होती आणि ती आता दररोज १३ ते १४ हजारांवर पोहोचली आहे.

मुंबईमध्ये रोज ३५० च्या जवळपास नवीन रुग्ण आढळून येत आहेत. यामुळे गेल्या एका आठवड्यात ९०० हून अधिक रुग्ण वाढले आहेत. यामुळेच शहरात लॉकडाऊनची चर्चा पुन्हा एकदा जोर धरू लागली आहे. पुन्हा लॉकडाऊन लागू करण्याची गरज पडू नये म्हणून राजकीय, धार्मिक आणि सामाजिक कार्यक्रमांवर बंदी घातली गेली आहे. तसंच विवाह आणि वाढदिवसाच्या कार्यक्रमात एकत्रितपणे ५० हून अधिक नागरिकांच्या गर्दीवर बंदी आहे.

coronavirus india : देशात करोनाच्या अॅक्टिव्ह रुग्णांची संख्या दीड लाखावर, अमित शहांनी दिल्या सूचना

करोना लसीकरण : दुसऱ्या टप्प्यात कुणाला लस मोफत, कुणी मोजणार पैसे

महाराष्ट्रात करोनाचे दोन प्रकार आढळले

दरम्यान, देशात ब्रिटनमधील करोनाच्या नवीन प्रकाराचे १८७ रुग्ण आढळले आहे. दक्षिण आफ्रिकेतील करोना संसर्ग ६ जणांना झाला आहे. तर एका व्यक्तीत ब्राझीलमधील करोनाचा संसर्ग आढळून आला आहे. महाराष्ट्रात करोनाचे दोन प्रकार आढळून आले आहेत. एक N440 K आणि दुसरा E484 K हा आहे. हो दोन्ही प्रकार महाराष्ट्रासह केरळ आणि तेलंगणमध्येही आढळून आले आहेत. महाराष्ट्र आणि केरळमधील काही जिल्ह्यांमध्ये करोनाच्या या दोन प्रकारांमुळेच करोना रुग्णांची संख्या वाढली का? यावर विश्वास ठेवण्यासाठी वैज्ञानिक दृष्ट्या अद्याप कुठलंही कारण समोर आलेलं नाही, असं नीती आयोगाचे सदस्य डॉ. व्ही. के. पॉल म्हणाले.