coronavirus: देशात करोनाचा फैलाव, हे आहेत हेल्पलाइन नंबर

नवी दिल्लीः देशात करोनाचा फैलाव वाढत चालला आहे. देशातील १५ राज्यांमध्ये करोना फैलाव झाला आहे. आज ओडिशामध्येही पहिला रुग्ण आढळला आहे. तर महाराष्ट्रात आणखी ५ रुग्ण आढळले आहेत. यामुळे महाराष्ट्रात करोनाच्या रुग्णांची संख्या ३८वर पोहोचली आहे. महाराष्ट्रात करोनाचे सर्वाधिक रुग्ण आढळले आहेत. करोनाचा प्रादुर्भाव वाढत चालल्याचं यावरून स्पष्ट होतंय.

महाराष्ट्रात आज करोनाचे आणखी ४ रुग्ण आढळलेत. मुंबईत ३, नवी मुंबईत १ आणि यवतमाळमध्ये १ रुग्ण आढळून आला आहे. यामुळे महाराष्ट्रातील करोना रुग्णांची संख्या ३८ झाली आहे. महाराष्ट्रातील रुग्ण संख्या वाढत असल्याने मुख्यमंत्री उद्धव ठाकरे आणि आरोग्यमंत्री राजेश टोपे यांनी उच्चस्तरीय बैठक बोलावली आहे.

महाराष्ट्रानंतर करोनाचे सर्वाधिक रुग्ण हे केरळमध्ये आहेत. केरळमध्ये करोनाचे २३ रुग्ण आढळून आले आहेत. तर उत्तर प्रदेशात १२ रुग्ण आढळलेत. दिल्लीत ७ रुग्ण, कर्नाटकात ६ आणि राजस्थान, जम्मू-काश्मीरमध्ये दोन आणि तेलंगणमध्ये ३ रुग्ण आहेत. तर राज्यांमध्ये प्रत्येकी १ रुग्ण आढळला आहे. तर कर्नाटक आणि दिल्लीत प्रत्येकी एका रुग्णाचा मृत्यू झाला आहे.