भारताचा जगासमोर आदर्श; करोना रुग्णसंख्या २ लाखाच्या आत, नवीन रुग्णही सर्वात कमी

नवी दिल्लीः करोना व्हायरसच्या लढाईत भारताने जगातील अनेक देशांना मागे टाकत शानदार कामगिरी केली आहे. देशातील करोनाच्या अॅक्टिव्ह रुग्णांची संख्या पहिल्यांदाच २ लाखांच्या खाली आली आहे. याशिवाय जगात भारतात दररोज सर्वांत कमी नवीन रुग्णांची नोंद होत ( १० लाखांच्या लोकसंख्येमागे ) आहे. एवढचं नव्हे तर लसीकरण मोहीमेतही देशाने गेल्या काही दिवसांत चांगली कामगिरी केली आहे. आतापर्यंत देशात ६, ७४, ८३५ जणांना लस देण्यात आली आहे, केंद्रीय आरोग्य मंत्रालयाने ही माहिती दिलीय.

देशात गेल्या चार महिन्यांत करोनाचे ८.२३ लाख अॅक्टिव्ह रुग्ण कमी झाले आहेत. यापूर्वी करोनाची रुग्णसंख्या सतत वाढत होती. देशात १७ सप्टेंबरला करोना रुग्णांची एकूण आकडा हा १०.१७ लाखांपर्यंत पोहोचला होता. आता ही संख्या १.९४ लाखांपर्यंत खाली आली आहे. गेल्या चोवीस तासांत देशात १३,७८० नवीन रुग्ण आढळले. १७,२२९ रुग्ण बरे झाले आहेत. तर १६१ जणांचा करोनाने मृत्यू झाला आहे. यासह देशात ३,६२१ इतके अॅक्टिव्ह रुग्ण कमी झाले आहेत. जानेवारीच्या १९ दिवसांत यामध्ये ५०,००० इतकी घट झाली आहे.

केरळमध्ये मात्र करोना संसर्गाचा प्रादुर्भाव वाढत आहे. केरळमध्ये मंगळवारी ६,१८६ नवीन रुग्ण आढळले. ४,२९६ बरे झाले आणि २६ जणांचा करोनाने मृत्यू झाला. राज्यात अॅक्टिव्ह रुग्णांची संख्या आकडा ७०,२६२ वर गेला आहे. केरळमध्ये उपचार घेत असलेल्या रुग्णांचे प्रमाण देशात सर्वाधिक आहे. आतापर्यंत देशात १.०५ कोटी नागरिकांना करोनाचा संसर्ग झाला आहे. यापैकी १.०२ कोटी रूग्ण बरे झाले आहेत. तर करोनाने १.५२ लाख जणांचा बळी गेला आहे. ही आकडेवारी covid19india.org वरून घेण्यात आली आहे.

शेजारधर्म! आजपासून भारत 'या' सहा देशांना पुरवणार करोना लस

लक्षद्वीपमध्ये पहिला रुग्ण

लक्षद्वीपमध्ये मंगळवारी पहिला रुग्ण आढळून आला. संसर्ग झालेली व्यक्ती ४ जानेवारीला कोची येथून लक्षद्वीप येथे पोहोचली. त्याच्या संपर्कात आलेल्या ३१ जणांची ओळख पटली आहे. यापैकी १३ जणांचा रिपोर्ट पॉझिटिव्ह आला आहे. सर्वांना क्वॉरंटाइन करण्यात आले आहे. लक्षद्वीपची लोकसंख्या सुमारे ६८,००० आहे. करोना व्हायरसच्या संसर्गापासून हा केंद्रशासित प्रदेश दूर होता. आता येथे एकूण १४ रुग्ण आढळून आले आहेत.

आसाममध्ये करोना लसीचे १००० डोस खराब झाल्याची शंका, चौकशीचे आदेश

राज्यांमधील स्थिती

दिल्लीत मंगळवारी करोनाचे २३१ नवीन रुग्ण आढळले. २२२ रुग्ण बरे झाले तर १० जणांचा मृत्यू. आतापर्यंत मध्य प्रदेशात मंगळवारी ३०४ नवीन रुग्ण आढळले. ७२५ रुग्ण बरे झाले आणि ७ जणांचा मृत्यू झाला. गुजरातमध्ये मंगळवारी ४८५ नवीन रुग्ण आढळले. राजस्थानमध्ये मंगळवारी २०९ नवीन रुग्ण आढळले. ५३७ रूग्ण बरे झाले आणि दोघांचा मृत्यू झाला.