भारतीय नौदलात 'करोना'चा शिरकाव, २१ जवान 'पॉझिटिव्ह'

नवी दिल्ली : देशातील करोना व्हायरसच्या फैलावादरम्यान या व्हायरसनं भारतीय नौदलातही शिरकाव केल्याचं उघड झालंय. भारतीय नौदलाचे २१ जवान करोना पॉझिटिव्ह आढळले आहेत. या सर्वांना मुंबईस्थित नेव्ही रुग्णालयात दाखल करण्यात आलंय. भारतीय नौदलात पहिल्यांदा करोना संक्रमणाची बातमी पुढे येतेय. या अगोदर भारतीय लष्करातही करोनानं शिरकाव केल्याचं समोर आलं होतं. भारतीय लष्करातील ८ जवानांना करोनाची लागण झाल्याचं समोर आलं होतं.

मिळालेल्या माहितीनुसार, भारतीय नौदलाच्या करोना पॉझिटिव्ह आढळलेल्या २१ जवानांना मुंबईतील INHS या नेव्ही रुग्णालयात आयसोलेशनमध्ये ठेवण्यात आलं आहे. यात 'आयएनएस आंग्रे' या नौदलाच्या प्रशासकीय तळावर आढळलेल्या २० करोनाबाधित जवानांचाही समावेश आहे. मुख्य म्हणजे, या जवानांमध्ये करोनाची कोणतीही लक्षणं आढळून आली नव्हती.

हे जवान ७ एप्रिल रोजी आढळलेल्या एकाच करोनाबाधिताच्या संपर्कात आले होते. 'आयएनएस आंग्रे'मध्ये हे सर्व जवान एकाच ठिकाणी राहत होते. यानंतर, बाधित परिसर आणि 'आयएनएस आंग्रे' या इमारतीला सील करण्यात आलंय. या भागाचं निर्जंतुकीकरणाचं कामही लवकरच पार पडेल. नौदलाच्या कोणत्याही जहाज किंंवा पानबुडीवर तैनात जवानांमध्ये अद्याप करोनाची लागण झाली नसल्याचं नौदलाकडून स्पष्ट करण्यात आलंय.

वाचा : Live: देशातील करोनाबाधितांचा आकडा १३,८३५ वर
वाचा : भारत करोनाशी लढतोय, पाक दहशतवादी पाठवतोयः लष्कर प्रमुख

लष्करातही करोनाचा शिरकाव

या अगोदर लष्करप्रमुख जनरल एम एम नरवणे यांनी लष्करातील आठ जवानांना करोनाची लागण झाल्याची माहिती दिली होती. यामध्ये दोन डॉक्टर आणि एका नर्सचाही समावेश आहे. तसंच करोनाबाधित व्यक्तीच्या संपर्कात नसलेल्या जवानांना त्यांचया युनिटमध्ये परत बोलावण्यात आलंय. यासाठी बंगळुरू ते जम्मू आणि बंगळुरू ते गुवाहाटी अशा दोन विशेष रेल्वेही निर्धारीत करण्यात आल्या आहेत.

वाचा : त्या रोहिंग्यांना शोधा, केंद्रीय गृहमंत्रालयाचे राज्यांना पत्र
वाचा : लॉकडाऊनः आजारी मुलासाठी आई २७०० KM वरून आली

देशात ११,६१६ जणांवर उपचार सुरू

दरम्यान, देशातील करोनाबाधित रुग्णांचा आकडा १३,८३५ वर पोहचलाय. यातील, १,७६७ रुग्णांवर उपचार यशस्वी ठरलेत तर ११,६१६ रुग्णांवर देशातील वेगवेगळ्या रुग्णालयांत उपचार सुरू आहेत. तर आत्तापर्यंत ४५२ जणांचा करोनामुळे मृत्यू झाला आहे.

वाचा : रेल्वेच्या भूमिकेची चौकशी करा
वाचा : सरकारच्या ‘त्या’ सूचनेचा दुरुपयोग होईल