दारुनंतर तंबाखू-बीडीसाठीही नागरिकांच्या लांबच लांब रांगा!

दौसा, राजस्थान : राजस्थानच्या गहलोत सरकारनं बीडी, सिगारेट, पान, तंबाखू, गुटखा यांची विक्री राज्यात पुन्हा एकदा सुरू केलीय. दौसामध्ये या दुकानांसमोर लांबच लांब रांगा लागलेल्या दिसल्या. पोलिसांनी अनेक ठिकाणी नागरिकांकडून सोशल डिस्टन्सिंगचं पालन करवून घेण्याचा अयशस्वी प्रयत्नही केला. परंतु, धुम्रपानाचं व्यसन असणाऱ्या जनतेला मात्र करोनाच्या भीतीपेक्षा तंबाखू, बीडी अधिक महत्त्वाची वाटत होती. त्यामुळे जिल्हा दंडाधिकाऱ्यांनाच यावर कारवाई करत बीडी विक्री तत्काळ थांबवण्याचे आदेश द्यावे लागले.

लॉकडाऊनमध्ये अशीच गर्दी दारुच्या दुकानांसमोरही दिसून आली होती. दारुची दुकानं उघडताच या दुकानांसमोर नागरिकांनी एकच गर्दी केली होती. आज राजस्थानच्या लालसोटमध्येही शेकडोच्या संख्येनं लोक बीडी खरेदी करताना दिसले. यावेळी, सोशल डिस्टन्सिंगचे नियम धाब्यावर बसवण्यात आले.



वाचा : भोपाळ: मजूर होता होम क्वारंटीन, पत्नी प्रियकरासोबत पळाली
वाचा : करोना: गेल्या २४ तासांमध्ये देशात आढळले ६,५३५ नवे रुग्ण

बीडी खरेदी करण्यासाठी आलेल्या नागरिकांनी सॅनिटायझर तर सोडाच पण मास्कही वापरण्याची तसदी घेतली नव्हती. सोशल डिस्टन्सिंगचंही पालन होत नसल्यामुळे इथं करोनाचा धोका आणखी वाढण्याची चिन्हं असल्याचं प्रशासनाच्या तत्काळ लक्षात आलं.



पोलिसांना याबद्दल सूचना मिळताच पोलीस घटनास्थळी उपस्थित झाले. आणि त्यांनी गर्दीला आवरण्याचा प्रयत्न केला. परंतु, गर्दी एवढी मोठी होती की पोलिसांनाही तिला आवरणं कठीण होऊन बसलं. त्यानंतर मात्र जिल्हाधिकारी अविचल चतुर्वेदी यांनी गोदामातून बीडी विक्रीसाठी लालसोट एसडीएम यांना सांगून कायदेशीर करण्याचे आदेश दिलेत तसंच बीडी विक्री तत्काळ बंद करण्यात आली.

वाचा : दिल्लीत ८३ परदेशी तबलिघींविरोधात २० चार्जशीट दाखल
वाचा : जगातील सर्वाधिक करोनाग्रस्तांच्या यादीत भारत दहावा