'भारतात ४९ दिवसांचा लॉकडाऊन आवश्यक'

नवी दिल्लीः करोना व्हायरसचा प्रादुर्भाव आटोक्यात आणण्यासाठी भारतासह जगभरातील अनेक देशांचे प्रयत्न सुरू आहेत. अनेक देशांनी ठिकठिकाणी लॉकडाऊन घोषित केला आहे. भारतातही पंतप्रधान मोदींनी २१ दिवसांचा लॉकडाऊन घोषित केला आहे. पण आता केम्ब्रीज विद्यापीठातील एका भारतीय वंशाच्या संशोधकाने नवीन गणितीय मॉडेल मांडलंय. यानुसार भारताला २१ नव्हे तर ४९ दिवसांचा लॉकडाऊन हवा आहे. त्यात वेळोवेळी थोडी ढिलही देता येईल. हा लॉकडाऊन दोन महिने कायम ठेवला पाहिजे. करोनाचा पुन्हा प्रादुर्भाव होऊ नये हेही आवश्यक असल्याचं त्यात म्हटलंय.

२१ दिवसांचा लॉकडाऊन परिणामकारक ठरणार नाही

राजेश सिंह केम्ब्रीजमधील व्यावहारीक गणित आणि सैद्धांतिक भौतिकी विभागात आहेत. त्यांच्या मदतीने हा रिसर्च मांडला गेलाय. भारतात जो २१ दिवसांचा लॉकडाऊन घोषित केला गेला आहे तो फारसा परिणामकारक ठरणार नाही. कारण करोना पुन्हा डोकं वर काढू शकतो. करोनावर उपाय म्हणून सोशल डिस्टन्सिंगच्या उपायावरही रिसर्चमधून मत मांडलं गेलं आहे. रिसर्च पेपरचं टायटल 'अॅज स्ट्रक्चर्ड इम्पॅक्ट ऑफ सोशल डिस्टन्सिंग ऑन द कोविड-१९ एपिडेमिक इन इंडिया' असं आहे.

फक्त लॉकडाऊन करून उपयोग नाही, तज्ज्ञांच मत

करोना संकटामुळे मोबाइल सेवा निशुल्क कराः प्रियांका गांधी

भारतातील वयोमानावर आधारित रिसर्च

या अभ्यासात सोशल डिस्टन्सिंगचा उपाय, शाळा, कॉलेजेस, ऑफिसेस बंद करणं, लॉकडाऊन आणि त्याच्या कालावधीच्या परिणामकारकतेवर विचार मांडला गेला आहे. करोनावर सध्या लस उपलब्ध नाही. अशावेळी करोनाची साखळी तोडण्यासाठी सोशल डिस्टन्सिंगचा उपाय यशस्वी ठरू शकतो. यामुळे करोनाचा प्रादुर्भाव उत्तम प्रकारे रोखता येईल, असं रिसर्चमध्ये म्हटलंय. भारतात २४ मार्चच्या मध्य रात्रीपासून २१ दिवसांचा लॉकडाऊन घोषित झाला आहे. हा लॉकडाऊन १४ एप्रिलपर्यंत आहे.