coronavirus करोना Live: देशातील रुग्णांची संख्या ३७० वर

संपूर्ण देशात करोना विषाणूची आज ७० हून अधिक लोकांना लागण झाल्याचे स्पष्ट झाली आहे. या बरोबरच भारतातील करोना रुग्णांची संख्या वाढून ती ३७० वर पोहोचली आहे. तर करोनामुळे मृत्युमुखी पडलेल्यांची संख्या आता ७ वर पोहचली आहे. पाहुयात करोना संसर्गाशी संबंधित अपडेट्स...

Live अपडेट्स...

>> गुजरातमध्ये एका करोना पॉझिटिव्ह आढळलेल्या व्यक्तीनं आज अखेरचा श्वास घेतल्याचं समोर आलंय. ६७ वर्षीय वृद्धाचा सूरतच्या एका खासगी रुग्णालयात मृत्यू झालाय. करोनामुळे झालेला हा गुजरात राज्यातील पहिला तर देशातील सातवा मृत्यू ठरला आहे.

>> देशभरात करोनाची लागण झालेल्यांची संख्या पोहोचली ३७० वर; केंद्रीय आरोग्य मंत्रालयाची माहिती.

>> बिहारमध्ये पाटणाच्या एम्स रुग्णालयात एका करोनासंक्रमित तरुणाचा मृत्यू... हा तरुण काही दिवसांपूर्वी कतारमधून मायदेशी परतला होता. करोनामुळे झालेल्या मृत्यूंमध्ये हा सर्वात कमी वयाचा रुग्ण ठरलाय.

>> भारतीयांना इटलीहून भारतात आणण्यासाठी मदत करणाऱ्या पथकालाही क्वारंटाइन होण्याच्या सूचना देण्यात आल्या आहेत.



>> छावला क्वारंटाइन कँपमध्ये पोहोचले इटलीहून आणलेले २६३ भारतीय.


>> बिहारमधील पाटणा येथे एका करोनाग्रस्त रुग्णाचा किडनी निकामी होऊन मृत्यू झाल्याची बिहारच्या मुख्य सचिवांची माहिती.

>> चेन्नई: स्पेनहून आलेल्या एका प्रवाशाला करोना विषाणूची लागण. त्याला क्वारंटाइन करून त्याच्यावर उपचार सुरू.

>> भारतात आता पर्यंत ३४१ जणांना करोनाची लागण.

>> महाराष्ट्रात एकूण १० नवे रुग्ण आढळले. यांमध्ये मुंबईतील ६ आणि पुण्यातील ४ रुग्णांचा समावेश आहे. राज्यातील एकूण रुग्णांची संख्या आहे ७४.

>> मुंबईतील एका रुग्णालयात करोनाची लागण झालेल्या एका ६५ वर्षीय रुग्णाचा मृत्यू. या रुग्णाला रक्तदाबासह मधुमेहही होता.