मजुरांना रस्त्यावरच केमिकलनं आंघोळ; अमानवीय प्रकार उघडकीस

बरेली, उत्तर प्रदेश: उत्तर प्रदेशातल्या बरेली जिल्ह्यातील प्रशासनिक अधिकाऱ्यांचा अमानवीय आणि धक्कादायक व्हिडिओ समोर आल्यानं एकच खळबळ उडालीय. करोना व्हायरसचा फैलाव रोखण्यासाठी संपूर्ण देशभर लॉकडाऊन सुरू आहे. त्यातच, अचानक बेरोजगारीची कुऱ्हाड कोसळल्यानं अनेक मजुरांनी मोठ्या शहरांतून पायीच चालत आपल्या घरचा रस्ता धरलेलं अनेक ठिकाणांहून समोर आलं. अशाच काही बाहेरच्या जिल्ह्यातून आलेल्या मजुरांना बरेलीमध्ये 'एन्टी लार्वा केमिकल'नं सामूहिक आंघोळ घातल्याचा धक्कादायक प्रकास समोर येतोय.

केमिकलनं आंघोळ

या मजुरांमध्ये नोएडाहून आलेल्या काही मजुरांचाही समावेश आहे. आपल्या कुटुंबीयांसोबत आणि सामानासहीत ते आपल्या गावी परतत होते, असं समजतंय. परंतु, करोनाच्या धास्तीनं पछाडलेल्या प्रशासनानं या मजुरांना चक्क केमिकलनं आंघोळ घातल्याचा एक व्हिडिओ सोशल मीडियामध्ये व्हायरल होतोय. दरम्यान, या व्हिडिओवर प्रशासन आणि बरेली पोलिसांकडून कोणतीही प्रतिक्रिया देण्यात आलेली नाही.

असं 'सॅनिटायझेशन' केलं जातं?

नोएडामध्ये करोना पॉझिटिव्ह रुग्ण आढळल्यानंतर हे मजूरदेखील करोना व्हायरस संक्रमित असू शकतात, असा संशय प्रशासन अधिकाऱ्यांना होता. त्यामुळे, त्यांनी या मजुरांना शहराच्या सीमेवरच्याच एका रस्त्यावर बसवून चक्क त्यांना केमिकलनं आंघोळ घालून कथितरित्या 'सॅनिटाईझ' केलं. त्यानंतर या मजुरांना आपल्या घराकडे रवाना करण्यात आलं.

काय आहे 'एन्टी लार्वा केमिकल'?

सूत्रांच्या माहितीनुसार, या मजुरांना आंघोळ घालण्यासाठी वापरण्यात आलेलं 'एन्टी लार्वा केमिकल' डेंग्यूच्या 'लार्वा'ला मारण्यासाठी वापरलं जातं. हा व्हिडिओ सोशल मीडियातून समोर आल्यानंतर त्याच्यावर खूप टीका झाली. परंतु, प्रशासनाकडून कोणतंही स्पष्टीकरण आलेलं नाही.