केजरीवाल यांच्यावरचा विश्वास उडाला आहे: अण्णा हजारे

मटा ऑनलाइन वृत्त। नवी दिल्ली

'दिल्लीचे मुख्यमंत्री अरविंद केजरीवाल आता बदलले आहेत. त्यांच्या डोक्यात आता राजकारण घुसले आहे. माझा त्यांच्यावरचा विश्वास उडाला आहे. त्यांच्यावर करण्यात आलेल्या आरोपांमध्ये काही दम नसेल तर, मग ते का घाबरतात?. माझ्यावर देखील आरोप केले गेले आहेत, परंतु मी घाबरलो नाही' अशा घणाघाती शब्दांत ज्येष्ठ समाजसेवक अण्णा हजारे यांनी दिल्लीचे मुख्यमंत्री अरविंद केजरीवाल यांना पुन्हा एकदा लक्ष्य केले आहे. केजरीवाल यांनी आपले पद सोडावे का?, या प्रश्नावर अण्णांनी, 'केजरीवाल यांच्यावर करण्यात आलेले आरोप सिद्ध झाले, तर त्यांनी राजीनामा द्यायला हवा'. असे मत व्यक्त केले आहे.

एका वृत्तवाहिनीला दिलेल्या मुलाखतीत अण्णा हजारे यांनी केजरीवाल यांच्यावरील आरोपांबाबत आपली मते व्यक्त केली. आपले हे मत व्यक्त करण्यापूर्वी काल (रविवार) अण्णांनी, 'केजरीवाल यांनी आपले स्वप्न तो़डले आहे', असे म्हटले होते. केजरीवाल यांच्यावर झालेल्या आरोपांनंतर आपण दु:खी असल्याचेही अण्णा काल म्हणाले होते.

आपल्या डोळ्यांदेखत आरोग्य मंत्री सत्येंद्र जैन यांनी केजरीवाल यांना 2 कोटी रुपये दिले असा आरोप मंत्रीपदावरून हटवण्यात आलेले माजी मंत्री कपिल मिश्रा यांनी केजरीवाल यांच्यावर केला आहे. याबरोबरच, केजरीवाल यांच्या एका नातेवाईकाचे डील 50 कोटी रुपयांत केले असे आपल्याला सत्येद्र जैन यांनी सांगितल्याचा दावाही मिश्रा यांनी केला आहे. या पार्श्वभूमीवर आपल्या भ्रष्टाचाराच्या लढाईत एकेकाळचे सहकारी असलेले अरविंद केजरीवाल यांच्यावर ज्येष्ठ समाजसेवक अण्णा हजारे यांनी टीकेची झोड उठवली आहे.