'त्यांना' घ्यायचे आहे मोदींचे दत्तक पालकत्व !

मटा ऑनलाइन वृत्त । गाजियाबाद

उत्तर प्रदेशमधील विधानसभा निवडणूक प्रचारात पंतप्रधान नरेंद्र मोदी यांनी केलेल्या 'दत्तक पुत्रा'च्या विधानावरून सुरू असलेला वाद शमत नाही तोच एका व्यक्तीने मोदींना दत्तक घेण्यासाठी कागदपत्रे सादर केली आहेत. मात्र, अधिकाऱ्यांनी तांत्रिक कारणे दाखवत त्या जोडप्याला परत पाठवले.

उत्तर प्रदेशचा विकास राज्याने घेतलेला दत्तक मुलगा करेल असे विधान बाराबांकी येथील जाहीर सभेत पंतप्रधान नरेंद्र मोदी यांनी केले होते. त्यानंतर उत्तर प्रदेश बाल अधिकार संरक्षण आयोगाने पंतप्रधानांना नोटीस बजावून तुम्हाला कोणी दत्तक घेतले याचा खुलासा करण्यास सांगितला. पंतप्रधानांना नोटीस बजावल्याचे वृत्त आल्यानंतर पतला-निवाडीतील योगेद्र पाल यांनी मोदींना दत्तक घेणार असल्याचे जाहीर केले. त्यासाठी त्यांनी दत्तक पत्र बनवले. योगेंद्र पाल मंगळवारी दत्तक पत्र घेऊन नोंदणी अधिकाऱ्यांकडे पोहचले. मात्र, नियमानुसार नोंदणीची प्रक्रिया पूर्ण करण्यासाठी ज्या दत्तक घेणार असल्याच्या मुलाचे पालकही उपस्थित असणे आवश्यक आहे. त्याशिवाय कायदेशीर प्रक्रिया पूर्ण होणार नसल्याचे अधिकाऱ्यांनी सांगितले.