हिंदू-मुस्लीम जोडप्याच्या 'लिव्ह-इन'ला परवानगी

मटा ऑनलाइन वृत्त । अहमदाबाद

एका १९ वर्षीय हिंदू मुलीला तिच्या २० वर्षीय मुस्लीम बॉयफ्रेंडसोबत 'लिव्ह-इन-रिलेशनशीप' मध्ये राहण्याची परवानगी गुजरात उच्च न्यायालयाने दिली आहे. मुलाचे वय लग्नासाठी अजून एक वर्षाने कमी आहे, तोपर्यंत ही दोघं लिव्ह-इनमध्ये राहणार आहेत.

शाळेत असतानाच या दोघांचे सूर जुळले आणि दोघांनी लग्नाचा निर्णय घेतला. पण दोघांनाही आपला धर्म बदलायचा नाही. अशात त्यांच्याकडे केवळ विशेष विवाह कायद्याचा पर्याय शिल्लक होता. विशेष म्हणजे यातल्या मुलीचे वय कायदेशीर विवाहयोग्य आहे आणि मुलाचे नाही.

त्यामुळे जुलै महिन्यात त्यांनी 'मैत्री करारा'साठी अर्ज केला. गुजरातमध्ये 'लिव्ह-इन-रिलेशनशीप' ला औपचारिक रूप देण्यासाठी हा करार केला जातो. पण जुलैमध्ये हा अर्ज करूनही, मुलीच्या आई-वडिलांनी सप्टेंबरमध्ये तिला जबरदस्ती आपल्यासोबत नेले. यानंतर मुलाने उच्च न्यायालयात हेबिअस कॉर्पस याचिका (एखाद्याला प्रत्यक्ष न्यायालयात हजर करण्याकरिता याचिका) दाखल केली. तिला तिच्या पालकांना तिच्या इच्छेविरुद्ध स्थानबद्ध केले आहे, असे सांगत तिला मुक्त करण्याची मागणी या याचिकेत त्याने केली.

ती ज्या भागात राहते तिथल्या पोलिसांनी तिला न्यायालयासमोर हजर केले. तिथे तिने त्या दोघांना लग्न करायचे आहे आणि तो २१ वर्षांचा झाल्यावर ती दोघं लग्न करणार असल्याचे तिने न्यायालयाला सांगितले. तिला आई-वडिलांसोबत राहायचे नाही, असेही तिने सांगितले. त्यानंतर न्यायालयाने त्या मुलाला तो २१ वर्षांचा झाल्यावर तिच्याशी लग्न करेल असे प्रतिज्ञापत्र न्यायालयात सादर करण्यास सांगितले.