coronavirus maharashtra : महाराष्ट्रात डबल म्युटेशन असलेल्या करोनाने वाढला प्रादुर्भाव, चिंतेची बाब : तज्ज्ञ

नवी दिल्लीः देशात करोनाचा प्रादुर्भाव पुन्हा वेगाने वाढत आहे. देशात करोनामध्ये डबल म्युटेशन झाल्याचे (करोनाचा नवीन प्रकार) आढळून आले आहे. यामुळे लस प्रभावी ठरेल का? असे अनेक प्रश्न नागरिकांना पडले आहेत. या प्रश्नांची उत्तरं प्रसिद्ध इम्यूनोलॉजिस्ट आणि एम्सचे माजी डीन प्रा. एन. के. मेहरा यांनी दिली आहे. या डबल म्युटेशन असलेल्या करोनाला अजिबात घाबरण्याची गरज नाही. हा व्हायरसही लवकरच संपेल, असा विश्वास त्यांनी व्यक्त केला आहे.

करोनाच्या नव्या प्रकारामुळे प्रादुर्भाव वेगाने वाढत आहे. पण यामुळे खरचं चिंतेची गरज आहे का, असा प्रश्न उपस्थित होतोय. जगातील बहुतेक देशांता हा करोनाचा नवी प्रकार आढळून आला आहे. तसंच व्हायरस आपलं स्वरुप सातत्याने बदलत असतो. भौगोलिक स्थितीनुसार ते वेगवेगळे असू शकतात. महत्त्वाचं म्हणजे त्याचा प्रादुर्भाव आणि त्याच्या लक्षणांवर बारकाईने लक्ष ठेवण्याची गरज आहे, असं मेहरा यांनी सांगितलं.

करोनाच्या नवीन प्रकाराने घाबरण्याची अजिबात गरज नाही. हा लवकरच संपेल. टेस्ट, ट्रॅक आणि ट्रीट या ३ बाबींवर आपल्याला भर द्यायचा आहे. रोजच पूर्ण काळजी घ्यायची आहे. मास्क घालणं गरजेचं आहे, सोशल डिस्टन्सिंग राखा आणि हात सतत धूत राहा, असं ते म्हणाले.

फारूक अब्दुल्लांना करोना, अब्दुल्ला कुटुंब सेल्फ आयसोलेशनमध्ये

करोनाच्या व्हेरियंट आणि स्ट्रेनमध्ये काही फरक असतो का? यावरही मेहरा यांनी स्पष्ट केलं. तांत्रिकदृष्ट्या त्याचे स्वरूप वेगळे आहे. RNA आपलं स्वरुप बदलताना अनेकदा एरर दाखवतात. यातून नवीन व्हायरस तयार होतो. हे व्हायरस एकसारखेच दिसतात. पण पूर्णपणे ते समान नसतात. व्हायरल व्हायरसमध्ये अशा बदलांना म्युटेशन म्हणतात. ज्या व्हायरसमध्ये असे म्युटेशन्स असतात त्यांना व्हेरियंट्स म्हणतात. एका व्हेरियंटमध्ये एक किंवा अनेक म्युटेशन्स (बदल) होऊ शकतात, असं त्यांनी स्पष्ट केलं.

coronavirus india : दिलासा! देशात करोनाच्या नवीन रुग्णांची संख्या काहीशी घटली

महाराष्ट्रात करोनाच्या वाढत्या संसर्गावरही ते बोलले. महाराष्ट्रात डबल म्युटेशन असलेला करोना व्हायरस आढळून आला आहे. त्याचे नमुने समोर आले आहेत. महाराष्ट्रात डबल म्युटेशन असलेल्या करोनामुळे प्रादुर्भाव वेगाने होत आहे. ही चिंतेची बाब आहे. पण करोनावरील जी लस आपल्याकडे आहे ती या डबल म्युटेशन्स असलेल्या नवीन करोनावरही प्रभावी आहे, असं प्रा. एन. के. मेहरांनी सांगितलं.