करोनाचं थैमान! यूपी, बिहार, राजस्थानचीही लॉकडाऊनच्या दिशेने वाटचाल

उत्तर प्रदेशात करोना संक्रमणाचा वाढता वेग लक्षात घेता अगोदर जाहीर करण्यात आलेल्या शनिवार-रविवारच्या 'विकेन्ड लॉकडाऊन'मध्ये आणखी एका दिवसाची वाढ करण्यात आलीय. आता उत्तर प्रदेशात रात्री ८.०० वाजल्यापासून मंगळवारी सकाळी ७.०० वाजेपर्यंत लॉकडाऊन राहणार आहे. या दरम्यान केवळ मेडिकल, दवाखाने, रुग्णालय, दूध-फळ-भाज्यांची दुकानं अशा अत्यावश्यक सेवाच सुरु राहतील.

याशिवाय उत्तर प्रदेशातील सर्व जिल्ह्यांत नाईट कर्फ्यूही सुरू आहेच. रात्री ८.०० ते सकाळी ७.०० वाजपेर्यंत हा नाईट कर्फ्यू लावण्यात आलाय. उत्तर प्रदेशातील करोना पॉझिटिव्हिटी दर ३० टक्क्यांपर्यंत पोहचलाय. उल्लेखनीय म्हणजे, अलाहाबाद हायकोर्टानं राज्यात १४ दिवस लॉकडाऊन लावण्याची सूचना राज्य सरकारला केली होती. परंतु, योगी सरकारनं मात्र याला नकार दिला होता.

करोना संक्रमणाच्या पार्श्वभूमीवर बिहारमध्ये नितिश कुमार सरकारनं बुधवारी नव्या गाईडलाईन्स जारी केल्या आहेत. यानुसार,

- रात्री ६.०० ते सकाळी ६.०० वाजेपर्यंत नाईट कर्फ्यू जाहीर केलाय.

- संपूर्ण राज्यात कलम १४४ लागू

- आता विवाह सोहळ्यात केवळ ५० जणांना सहभागी होता येईल

- अंत्यसंस्कारात २० जण सहभागी होऊ शकतील

- दुपारी ४.०० वाजेपर्यंत दुकाने सुरू असतील

- औषध व दुधाची दुकाने खुली राहतील

- औद्योगिक आस्थापनांमध्ये बांधकामांचे काम सुरू राहील

- ई-कॉमर्सशी संबंधित सर्व कामं सुरू राहतील

- आरोग्य क्षेत्राशी संबंधित सर्व आस्थापनं व उपक्रम सुरू राहतील

- हातगाड्यांवरून फळ आणि भाज्या विक्रीस परवानगी

- शेती व संबंधित कामे सुरूच राहतील

- रात्री ९.०० वाजेपर्यंत रेस्टॉरंट, हॉटेलमधून जेवण घरी घेऊन जाण्याची परवानगी

राजस्थानत गेल्या आठवड्यापासून पुन्हा एकदा गहलोत सरकारनं विकेन्ड कर्फ्यूची घोषणा केलीय. यानुसार, शुक्रवारी सायंकाळी ६.०० वाजल्यापासून ते सोमवारी सकाळी ५.०० वाजेपर्यंत 'विकेन्ड लॉकडाऊन' सुरू राहील. हा आदेश २५ एप्रिल सकाळी ५.०० वाजल्यापासून लागू होईल.

सरकारी आदेशानुसार सोमवारी ते शुक्रवारी सकाळी ६.०० ते ११.०० या वेळेत सर्व खाद्यपदार्थांची दुकाने, किराणा सामान, पीठ गिरणी, गुरांचे खाद्य दुकाने सुरू राहतील. त्याचबरोबर, सोमवारी आणि गुरुवारी सकाळी ६.०० ते ११.०० या वेळेत कृषी विनिमय विक्रेत्यांची दुकानं खुली राहतील. दूध व दुग्धजन्य पदार्थांची दुकाने दररोज सकाळी ६.०० ते ११.०० आणि सायंकाळी ५.०० ते सायंकाळी ७.०० या वेळेत उघडता येतील. मंडई, फळभाज्या, फुलांच्या हार आणि भाजीपाला व फळांच्या गाड्या दररोज सकाळी ६.०० ते ११.०० वेळेत खुल्या राहतील.

मध्य प्रदेशात छिंदवाडा, रतलाम, सागर आणि जबलपूरसह भोपाळमध्ये निर्बंधात वाढ करण्यात आलीय. भोपाळमध्ये ३ मे पर्यंत लॉकडाऊनसारखे निर्बंध कायम राहतील. त्याचबरोबर छिंदवाडा, रतलाम, सागर आणि जबलपूरमध्ये ही बंदी १ मे पर्यंत कायम राहील. मार्गदर्शक सूचनांनुसार, अनिवार्य सेवा वगळता सर्व सरकारी व खासगी कार्यालये १० टक्के कर्मचार्‍यांच्या उपस्थितीसह सुरू राहतील. सामाजिक, राजकीय, क्रीडा, करमणूक, शैक्षणिक, सांस्कृतिक, सार्वजनिक आणि धार्मिक कार्यक्रमांसाठी लोकांच्या मेळाव्यास पूर्णपणे बंदी जाहीर करण्यात आलीय.