चीनमध्ये हाहा:कार; भारतात करोनाची लाट कधी येणार? किती धोकादायक असणार?; तज्ज्ञ म्हणतात...

नवी दिल्ली: चीनमध्ये करोनाची लाट आली आहे. रुग्णांच्या संख्येत प्रचंड मोठी वाढ झाली असून आरोग्य सुविधांवर प्रचंड मोठा ताण आला आहे. करोनामुळे चीनमधील परिस्थिती हाताबाहेर गेली आहे. त्यामुळे भारताची चिंता वाढली आहे. अधिकृत सुत्रांनी दिलेल्या माहितीनुसार, पुढील ४० दिवस भारतासाठी अतिशय गंभीर असू शकतात. जानेवारीत करोनाचे रुग्ण वाढण्याची दाट शक्यता आहे. मागील ट्रेंड पाहून करोना रुग्णवाढीबद्दलचा अंदाज वर्तवण्यात आला आहे.

पूर्व आशियामध्ये करोनाचा फैलाव झाल्यावर पुढील ३० ते ३५ दिवसांत भारतात करोनाची लाट येत असल्याचं याआधी दिसून आलं आहे. त्याच्या आधारे शास्त्रज्ञांकडून पुढील लाटेचा अंदाज वर्तवला जातो. आरोग्य मंत्रालयातील सुत्रांनी दिलेल्या माहितीनुसार, यावेळी होणारा करोनाचा फैलाव जास्त गंभीर नाही. त्यामुळे करोनाची लाट आल्यास रुग्णांच्या संख्या, मृत्यूंची संख्या अधिक नसेल. करोनाचा नवा व्हेरिएंट BF.7 वर औषधं आणि लस किती प्रभावी आहे त्याबद्दल आरोग्य मंत्रालयाचा अभ्यास सुरू आहे.
करोना वाढला असताना चीनचा भयंकर निर्णय; जग धोक्याच्या उंबरठ्यावर, वुहानची पुनरावृत्ती होणार?
गेल्या दोन ते तीन दिवसांत ६ हजार आंतरराष्ट्रीय प्रवाशांची तपासणी करण्यात आली. त्यातील ३९ आंतरराष्ट्रीय प्रवासी करोना पॉझिटिव्ह आढळून आले. या पार्श्वभूमीवर आरोग्य मंत्री मनसुख मांडविया उद्या दिल्ली विमानतळावर जाऊन परिस्थितीचा आढावा घेतील.

आरोग्य मंत्रालयानं दिलेल्या आकडेवारीनुसार, बुधवारी देशात करोनाचे १८८ नवे रुग्ण आढळून आले. त्यामुळे सध्या उपचाराधीन असलेल्या रुग्णांची संख्या ३ हजार ४६८ वर पोहोचली. सध्याच्या घडीला पॉझिटिव्हीटीचा दर ०.१४ टक्क्यांवर पोहोचला आहे.
चीनमध्ये करोनाचा विस्फोट; रोज दहा लाख रुग्ण पॉझिटिव्ह, काही दिवसात रुग्णसंख्या दुप्पट होण्याची भीती
चीनमधील करोना परिस्थिती अतिशय भीषण आहे. नव्या व्हेरिएंटनं चीनमध्ये अक्षरश: थैमान घातलं आहे. चीनमध्ये दररोज करोनाचे लाखो रुग्ण सापडत आहेत. रुग्णालयांमधील जागा अपुऱ्या पडू लागल्या आहेत. चीनमध्ये औषधांचा मोठा तुटवडा जाणवत आहे.