क्रिकेटपटू मोहम्मद शमीच्या केअरटेकरवर हल्ला

मटा ऑनलाइन वृत्त । कोलकाता

अपार्टमेंटच्या बाहेर गाडी पार्किंग करण्यासाठी थांबलेला भारतीय क्रिकेटपटू मोहम्मद शमीच्या केअरटेकरवर क्षुल्लक कारणांवरून तीन तरुणांनी धक्काबुक्की करीत हल्ला केला. ही घटना शनिवारी काटजू नगर या ठिकाणी घडली. मोहम्मद शमीच्या तक्रारीवरून पोलिसांनी तीन जणांना पोलिसांनी अटक केली आहे.

जादवपूरमधील अपार्टमेंटमध्ये मोहम्मद शमीला त्याची गाडी पार्किंग करायची होती. तो आपल्या केअरटेकरच्या मदतीने गाडी पार्किंग करण्याच्या प्रयत्नात होता. परंतु रस्त्यात गाडी उभी का केलीस?, अशी विचारणा करीत तीन तरुणांनी मोहम्मद शमीला दमदाटी केली. हे तिघेही यावेळी नशेत होते. शमीच्या मदतीसाठी धावून आलेल्या केअरटेकरला धक्काबुक्की करीत त्याच्यावर या तीन जणांनी हल्ला केला.

Kolkata:3 arrested after cricketer Mohd Shami complained against them in Jadavpur for manhandling apartment's caretaker after an altercation pic.twitter.com/mdMcEQ9gJL — ANI (@ANI_news) July 18, 2017
मोहम्मद शमी व केअरटेकर यांच्याशी वाद घातल्यानंतर तेथून गेलेले हे तरुण पुन्हा १५ मिनिटांनंतर परत आले. त्यांनी इमारतीत बळजबरी घुसण्याचा प्रयत्न केला. पोलिसांना बोलावू का?, असे शमीने सांगितल्यानंतर हे तरूण त्या ठिकाणाहून पसार झाले. हा सर्व प्रकार सीसीटीव्हीमध्ये रेकॉर्ड झाला आहे. पोलिसांनी सीसीटीव्हीच्या मदतीने जयंत सरकार, स्वरूप सरकार आणि शिवा प्रामाणिक या तीन तरुणांना अटक केली.