CRPF मध्ये प्रथमच महिला कोब्रा कमांडो, नक्षलवाद्यांचा काळ बनणार

नवी दिल्लीः केंद्रीय राखीव पोलिस दलात (CRPF) प्रथमच कमांडो बटालियन फॉर रेझोल्यूट अॅक्शन (crpf anti naxal cobra unit) कमांडो युनिटमध्ये महिला कमांडोचा समावेश होणार आहे. या महिला कमांडो नक्षलवाद्यांविरूद्धच्या मोहीमेत नेतृत्व करतील. यासाठी सीआरपीएफच्या सर्व ६ महिला बटालियनमधून ३४ महिला जवानांची निवड करण्यात आली असून त्यांना प्रशिक्षणही दिले जात आहे.

आपण लिंगाच्या आधारे भेदभाव केला तर आपल्या नेतृत्वातील उणीवांचं प्रदर्शन होईल. प्रशिक्षणानंतर महिला कोब्रा कमांडोना नक्षलग्रस्त भागात तैनात करण्यात येईल, अशी माहिती CRPF चे प्रमुख ए. पी. माहेश्वरी यांनी शनिवारी दिली.

पहिली महिला बटालियन १९८६ मध्ये स्थापन

सीआरपीएफमध्ये १९८६ मध्ये पहिली महिला बटालियन तयार करण्यात आली होती. महिला बटालियनच्या ३५ व्या स्थापना दिनानिमित्त महिला जवानांची कोब्रा प्रशिक्षणासाठी औपचारिकरित्या निवड झाली. निवड झालेल्या ३४ महिला जवानांनी स्वेच्छेने त्यांची नावं कोब्रा युनिटमध्ये जाण्यासाठी दिली होती. याशिवाय आणखी २०० महिला जवानांनीही या युनिटमध्ये सहभागी होण्यासाठी आपली नावं दिली आहेत, अशी माहिती सीआरपीएफचे डीआयजी एम. दिनाकरन यांनी वृत्तसंस्थेशी बोलताना दिली.

सीआरपीएफच्या पुरुष जवानांसोबत होणार तैनाती

महिला जवानांची शारीरिक क्षमता आणि तांत्रिक समज वाढेल. यात गोळीबार आणि विशेष शस्त्रे, नियोजन, फील्ड क्राफ्ट, स्फोटके आणि जंगलाती जगण्याच्या कौशल्यासह चांगले प्रशिक्षण दिले जाईल, असं सीआरपीएफच्या एका अधिकाऱ्याने वृत्तसंस्थेला सांगितले. कोब्रा कमांडोचे प्रशिक्षण पूर्ण झाल्यानंतर महिला कमांडोंना पुरुष कमांडोसह नक्षलग्रस्त भागात तैनात केले जाईल, असं ते म्हणाले.

CRPF मध्ये १० कोब्रा युनिट

सीआरपीएफमध्ये २००८ -०९ मध्ये दोन कोब्रा युनिट बटालियनची स्थापना केली गेली. २००९-१० मध्ये बटालियनची संख्या वाढवून ४ वर करण्यात आली. त्यानंतर २०१०-११ मध्ये आणखी ४ बटालियन तयार झाल्या. सीआरपीएफकडे सध्या २४६ बटालियन आहेत. यामध्ये २०८ अधिकारी, ६ महिला, १५ आरएएफ, १० कोब्रा, ५ सिग्नल, एक स्पेशल ड्युटी ग्रुप आणि संसदेतील सुरक्षेसाठी एका ग्रुपचा समावेश आहे.

परराष्ट्रमंत्र्यांचा चीनला सूचक इशारा, 'करोनानंतरचा भारत पूर्वीपेक्षा...'

रतन टाटा भावुक, ''भारतरत्न'साठीचं कॅम्पेन थांबवा, माझं भाग्य...'

नक्षलग्रस्त राज्यांमध्ये तैनात

कोब्रा कमांडोमधील बहुतेक टीम या नक्षलग्रस्त राज्यांमध्ये तैनात करण्यात आल्या आहेत. आणि काही टीम या ईशान्येकडील राज्यांमध्ये अतिरेकी विरोधी ऑपरेशनसाठी तैनात आहेत. कोब्रा युनिटमध्ये समावेश होणाऱ्या जवानांना मानसिक आणि शारीरिक पातळीवर कठोर निकष पूर्ण करावे लागतात.