छत्तीसगड: माओवादी हल्ल्यात १२ जवान शहीद

मटा ऑनलाइन वृत्त । सुकमा

छत्तीसगड येथे आज सकाळी माओवादी आणि सीआरपीएफ जवानांमध्ये जोरदार चकमक झाली. माओवाद्यांनी केलेल्या या हल्ल्यात सीआरपीएफचे १२ जवान शहीद झाले आहेत. तसेच या हल्ल्यात जखमी झालेल्या जवानांना भेज्जी येथील रुग्णालयात हलविण्यात आले असून त्यांच्यावर उपचार सुरू आहेत.

आज सकाळी ९ वाजता सुकमा जिल्ह्यातील भेज्जी परिसरात हा हल्ला झाला. या परिसरात माओवादी लपून बसल्याची खबर मिळताच सीआरपीएफच्या जवानांनी सर्च ऑपरेशन सुरू केले. त्यावेळी माओवाद्यांनी केलेल्या गोळीबारात १२ जवान शहीद झाले. हे सर्व जवान सीआरपीएफच्या २१९ व्या बटालियनचे होते, असे छत्तीसगडचे मुख्यमंत्री रमण सिंह यांनी सांगितले. या हल्ल्यानंतर माओवाद्यांनी जवानांकडील शस्त्रे आणि रेडियो सेटस पळवून नेले आहेत. दरम्यान या हल्यात जखमी झालेल्या जवानांना भेज्जी येथील रूग्णालयात दाखल करण्यात आले आहे.
Chhattisgarh: According to latest information, 9 CRPF jawans have lost their lives in Maoist attack in Sukma says CM Raman Singh pic.twitter.com/lcrDL5cAyi — ANI (@ANI_news) March 11, 2017
पंतप्रधानांची श्रद्धांजली

दरम्यान सुकमा येथे झालेल्या माओवादी हल्ल्यात शहीद झालेल्या जवानांना पंतप्रधान नरेंद्र मोदी श्रद्धांजली अर्पण केली आहे. केंद्रीय गृहमंत्री राजनाथ सिंह यांच्याशी चर्चा करण्यात आली असून ते सुकमाला रवाना होत असल्याची माहिती मोदी यांनी टि्वटद्वारे दिली आहे.