वृत्तसंस्था, नवी दिल्ली
'प्रादेशिक शांतता आणि स्थिरता राखण्यामध्ये अमेरिकेचे चीनबरोबर परस्परहितसंबंध आहेत. मसूद अझरला जागतिक दहशतवादी म्हणून घोषित करण्यास चीनने आडकाठी घातल्यामुळे या हितसंबंधांना तडा गेला आहे,' अशी प्रतिक्रिया भारतामधील अमेरिकी दूतावासाच्या प्रवक्त्यांनी गुरुवारी दिली आहे. चीनने बुधवारी मसूद अझरला जागतिक दहशतवादी म्हणून घोषित करण्यापासून रोखल्यानंतर अमेरिकेकडून करण्यात आलेली ही सर्वांत तीव्र टीका आहे. 'दहशतवाद्यांची यादी अद्ययावत ठेवण्यासाठी संयुक्त राष्ट्रांच्या प्रतिबंध समितीमध्ये काम करणे अमेरिका सुरूच ठेवेल,' असेही त्यांनी म्हटले आहे. अधिकाऱ्यांनी सांगितले, की 'प्रतिबंध समितीमध्ये करण्यात आलेल्या चर्चा या गोपनीय असल्यामुळे त्यावर भाष्य करता येणार नाही. पण, समितीमध्ये काम करणे आम्ही सुरूच ठेवू. अझरच्या बाबतीत चीनने घेतलेल्या भूमिकेमुळे परस्परहितसंबंधांना तडा गेला आहे. जैश-ए-महंमद संघटनेला संयुक्त राष्ट्रांनी दहशतवादी संघटना म्हणून घोषित केले आहे. मसूद यानेच या संघटनेची स्थापना केली असल्याने त्याला दहशतवादी म्हणून घोषित करण्याचे सर्व निकष पूर्ण होतात.'