‘ग्राहकांना द्या व्याजासह परतावा’

नवी दिल्लीः गुरुग्राम येथील ‘युनिटेक व्हिस्टा’ या गृहप्रकल्पातील ग्राहकांना घराचा ताबा देण्यास विलंब झाल्याप्रकरणी सुप्रीम कोर्टाने ३९ ग्राहकांना १४ टक्के दराने व्याजाचे पैसेही देण्याचे आदेश सुप्रीम कोर्टाने सोमवारी दिले. या ३९ ग्राहकांनी अंदाजे १६ कोटी ५५ लाख रुपये या प्रकल्पासाठी गुंतवले आहेत. ग्राहकांना व्याजाचे पैसे १ जानेवारी २०१० पासून द्यावेत, असा आदेश कोर्टाने दिला असून, त्यासाठी बिल्डरला आठ आठवड्यांची मुदत देण्यात आली आहे. न्या. दीपक मिश्रा यांच्या अध्यक्षतेखालील खंडपीठाने याबाबतचे आदेश दिले आहेत. ‘युनिटेक’तर्फे पी. चिदंबरम यांनी कोर्टात बाजू मांडली.

गुरुग्राम येथील गृहप्रकल्प वेळेत पूर्ण न झाल्यामुळे नुकसानभरपाई देण्याची मागणी ग्राहकांनी केली होती. गेल्या वर्षी १८ नोव्हेंबर रोजी या प्रकरणात सुनावणी झाली होती. ग्राहकांचे १६ कोटी रुपये परत देण्याचे आदेशही देण्यात आले होते. मात्र, या रकमेवर व्याजही देण्यात यावे, अशी मागणी ग्राहकांनी केली होती. ‘ग्राहक आणि बिल्डर यांच्यातील संबंध दृढ विश्वासावरच निर्माण होतात. त्यामुळे गृहनिर्माण प्रकल्प बांधताना संबंधित बिल्डरने ग्राहकांचा विश्वासघात केला असून, या प्रकरणी ग्राहकांना झालेल्या त्रासाची भरपाई देणे आवश्यक आहे,’ असे सुप्रीम कोर्टाने निकाल देताना स्पष्ट केले आहे.