'नीट पीजी'चा कट ऑफ १५ टक्क्यांनी कमी

वृत्तसंस्था, नवी दिल्ली

वैद्यकीय क्षेत्रातील पदव्युत्तर पदवी आणि सुपर स्पेशिअॅलिटी अभ्यासक्रमांच्या प्रवेशासाठी घेण्यात येणाऱ्या राष्ट्रीय पात्रता परीक्षेच्या (नीट) कट ऑफमध्ये १५ टक्के कपात करण्याचा महत्त्वपूर्ण निर्णय केंद्रीय आरोग्यमंत्र्यांनी घेतला आहे. याचा फायदा देशातील सुमारे १८ हजार विद्यार्थ्यांना होऊ शकणार आहे.

वैद्यकीय क्षेत्रातील पदव्युत्तर पदवी शिक्षण देणाऱ्या संस्थांमधील रिक्त जागा भरण्यासाठीही या निर्णयाचा फायदा होणार आहे. केंद्रातील मोदी सरकारने देशातील आरोग्य व्यवस्था सुधारण्याला प्राधान्य दिले आहे. यामुळे यासाठी आरोग्य क्षेत्रात अतिरिक्त मनुष्यबळ निर्माण होणे आवश्यक आहे. या सर्व पार्श्वभूमीवर हा निर्णय घेण्यात आल्याचे केंद्रीय आरोग्यमंत्री जे. पी. नड्डा यांनी सांगितले.