योगी आदित्यनाथांना वडिलांचा सल्ला

टाइम्स न्यूज नेटवर्क । डेहराडून

''बुरखावाल्या महिलांनीही आदित्यनाथला मत दिलंय. त्यामुळं त्यानं त्यांचीही काळजी घ्यायला हवी. सर्वांना सोबत घेऊन जावं. सर्व धर्मांचा आदर करून लोकांची मनं जिंकावीत.''

हे उद्गार आहेत उत्तर प्रदेशचे नवनिर्वाचित मुख्यमंत्री योगी आदित्यनाथ यांचे वडील आनंदसिंग बिस्ट यांचे. निवृत्त वनअधिकारी असलेले ८४ वर्षीय आनंदसिंग सध्या त्यांच्या पत्नीसोबत उत्तराखंडच्या पौरी जिल्ह्यातील पांचूर गावात राहतात. ऐन तारुण्यात घर सोडून संन्यासी झालेला आपला मुलगा देशातील सर्वात मोठ्या राज्याचा मुख्यमंत्री झाल्याच्या पार्श्वभूमीवर आनंदसिंग यांनी 'टाइम्स ऑफ इंडिया'शी बोलताना आपल्या भावना व्यक्त केल्या. मुलाच्या संन्यासाचा निर्णय पचवणं आम्हाला खूपच जड गेलं होतं, असं त्यांनी सुरुवातीलाच सांगितलं. मात्र, त्याच्या आतापर्यंतच्या वाटचालीबद्दल त्यांनी समाधानही व्यक्त केलं. मुख्यमंत्रिपदामुळं त्याच्या खांद्यावर आलेली जबाबदारी मोठी असल्याचं ते म्हणाले. 'यूपीतील मुस्लिमांनीही भाजपला मतं दिली आहेत. 'तीन तलाक'सह अन्य काही बाबतीत मुस्लिम महिलांना भाजपकडून मोठ्या अपेक्षा आहेत. सर्व जातीधर्माच्या लोकांनी भाजपवर विश्वास दाखवला आहे. आदित्यनाथानं हे गोष्ट ध्यानात ठेवायला हवी. त्यानं सर्वांना सोबत घेऊन प्रगतीच्या वाटेवर चालावं,' अशी अपेक्षा आनंदसिंग यांनी व्यक्त केली.

ते पुढं म्हणाले, 'पहिल्याच दिवशी आदित्यनाथानं सरकारी अधिकारी व आमदारांना आक्षेपार्ह वक्तव्यांपासून दूर राहण्याचा सल्ला दिलाय. त्यावरून त्यानं ही जबाबदारी गंभीरपणे घेतलीय हे दिसतंय. त्यानं स्वत:वरील हिंदुत्ववादाचा शिक्का पुसून टाकण्याचा प्रयत्न करायला हवा.'