दलित नेता जिग्नेश मेवाणी यांचा दणदणीत विजय

अहमदाबाद: उना दलित अत्याचारानंतर दलितांचा आवाज बनलेले जिग्नेश मेवाणी यांनी गुजरात विधानसभा निवडणुकीत बनासकांठा जिल्ह्यातील वडगाम मतदार संघात भाजपचे उमेदवार विजय चक्रवर्ती यांचा १९६९६ मतांनी पराभव केला. काँग्रेसने समर्थन दिलेले अपक्ष उमेदवार मेवाणी यांना ९५४९७ मते मिळाली. हा मतदार संघ अनुसूचित जातीसाठी राखीव होता. भाजपच्या चक्रवर्तींना ७५८०१ मते मिळाली. या विजयानंतर मेवाणी यांनी आपल्या प्रचार अभियानात मदत करणाऱ्या सर्व सामाजिक संघटनांचे तसेच राजकीय पक्षांचे आभार मानले आहेत.

जिग्नेश मेवाणी यांची देशपातळीवर गुजरातमधील दलित आंदोलनाचा चेहरा अशी ओळख आहे. आपण युवक आणि अनेक आंदोलकांनी आग्रह केल्यामुळे निवडणुकीच्या मैदानात उतरण्याचा निर्णय घेतला असे मेवाणी यांनी सोशल मीडियावर व्यक्त केलेल्या प्रतिक्रियेत म्हटले आहे. राज्यातील भाजप सरकारचे टीकाकार समजले जाणारे मेवाणी हे गेल्या वर्षी उना येथे स्वयंघोषित गोरक्षकांद्वारे सात दलित युवकांना मारहाण केल्यानंतर चर्चेत आले होते.