लज्जास्पद! दलित असल्याने पंचायत समिती अध्यक्ष महिलेला खाली बसवले

चेन्नई : तमिळनाडूतील कुडलोर जिल्ह्यात पंचायत समितीच्या अध्यक्ष असलेल्या एका दलित महिलेला अपमानास्पद वागणूक देण्यात आल्याचा प्रकार उघडकीस आला आहे. थेरकू थित्ताई गावातील पंचायत समितीच्या महिला अध्यक्षांना बैठकीच्या वेळी जमिनीवर बसविण्यात आले; तर बाकी सर्व सदस्य मात्र खुर्चीवर बसले होते. हा प्रकार छायाचित्रांसह सोशल मीडियावर व्हायरल झाला. त्यानंतर जिल्हाधिकाऱ्यांनी पंचायत समितीच्या सचिवांना निलंबित केले असून, प्रकरणाची चौकशी करण्याचे आदेश दिले आहेत.

संबंधित महिला अध्यक्षांनी सांगितले, की केवळ जातीमुळे उपाध्यक्ष मला अपमानास्पद वागणूक देतात. त्यांनी मला जमिनीवर बसण्यास सांगितले. ध्वजारोहणदेखील मला करू दिले नाही. त्यांचे वडील ध्वजारोहण करतील, असे ते म्हणाले. मी सर्व सदस्यांना सहकार्य करत असूनही मला अशा पद्धतीने वागणूक दिली जात आहे.

दरम्यान, पंचायत समितीच्या उपाध्यक्षावर गुन्हा दाखल करण्यात आला असून, त्याला कोणत्याही क्षणी अटक होऊ शकते. तो सध्या फरारी आहे.