हुशार असल्याने दलित विद्यार्थ्याला मारहाण!

मटा ऑनलाइन वृत्त । पाटणा

आपल्यापेक्षा जास्त गुण मिळतात, या रागातून दोन सवर्ण विद्यार्थ्यांनी शाळेच्या वर्गातच एका दलित विद्यार्थ्याला लाथा-बुक्क्यांनी बेदम मारहाण केल्याचा संतापजनक प्रकार बिहारमधील मुझफ्फरपूर येथे सरकारी शाळेत घडला आहे. याबाबतचा एक व्हिडिओ सोशल मीडियावर व्हायरल झाल्यानंतर पीडित विद्यार्थ्याच्या आजोबांनी पोलिसांकडे तक्रार दिली आहे.

आपल्या घरच्यांना त्रास होईल, या भीतीने पीडित विद्यार्थ्याने या प्रकाराबाबत कुठेही वाच्यता केली नव्हती. मात्र, व्हिडिओ व्हायरल झाल्यानंतर पीडित विद्यार्थी माध्यमांपुढे आला आहे. तो म्हणतो, 'गेल्या दोन वर्षांपासून हे छळसत्र सुरू आहे. आपल्यापेक्षा जास्त गुण मिळतात, याचाच राग त्यांना आहे. यातील एक विद्यार्थी माझ्या वर्गातील आहे तर दुसरा विद्यार्थी कनिष्ठ आहे. एकाचे वडील तर दुसऱ्या विद्यार्थ्याचा भाऊ गुन्हेगारी पार्श्वभूमी असलेले आहेत. मी दलित असूनही एवढा हुशार कसा, हा त्यांचा प्रश्न होता. त्यातूनच ते माझा द्वेष करतात. ते दोघे माझ्या तोंडावरही अनेकदा थुंकलेत. ही बाब मी शिक्षकांच्या कानावर घातली तेव्हा त्यांनी सहानुभूती दर्शविली पण, संबंधित मुलांचे पालक गुन्हेगारी प्रवृत्तीचे असल्याने शाळा काहीही कारवाई करू शकत नसल्याचे सांगून त्यांनी जबाबदारी झटकली. त्यानंतर शाळा कारवाई करत नसेल तर आपण कुठे दाद मागायची?, असा प्रश्न मला पडला आणि मी गप्प राहायचे ठरवले, असे हा विद्यार्थी सांगतो.

भीतीने शाळेतच जात नाही!

वर्गातील मारहाणीचा व्हिडिओ अचानक सोशल मीडियावर व्हायरल झाला आणि या संपूर्ण प्रकाराला वाचा फुटली. हा व्हिडिओ पाहिल्यानंतर पीडित मुलाच्या आजोबांनीच थेट पोलीस ठाणे गाठून तक्रार दाखल केली. गंभीर म्हणजे त्यानंतर दोन-तीन इसमानी घरी जाऊन तक्रार मागे घेण्यासाठी त्यांना धमकी दिल्याचे पीडित विद्यार्थ्याचे म्हणणे आहे. सध्या या विद्यार्थ्याने शाळेत जाणे बंद केले आहे. ही स्थिती अशीच राहिली तर त्याचं यंदाचं शैक्षणिक वर्ष धोक्यात येण्याची भीती आहे.