पीळदार मिशी ठेवल्याने दलित तरुणाला मारहाण

अहमदाबादः

गुजरातमध्ये दलित अत्याचाराची एक घटना समोर आली आहे. साबरकांठा जिल्ह्यातील इडार तालुक्यात ठाकूर समाजाच्या आठ तरुणांनी एका दलित तरुणाला मारहाण करून त्याची मिशी कापल्याचा आरोप आहे. गोरल गावात झालेल्या या घटनेनंतर साबरकांठा पोलिसांनी आठ तरुणांविरोधात अॅट्रॉसिटीचा गुन्हा दाखल केला आहे.

पीडित तरुणाचे नाव अल्पेश पंड्या असे आहे. सोशल वर्कमध्ये पदव्युक्तर शिक्षण घेणाऱ्या अल्पेश पंड्याने पीळदार मिशी ठेवली होती. या मिशीवरून झालेल्या वादानंतर त्याला मारहाण झाली. यात जखमी झालेल्या अल्पेश पंड्याला रुग्णालयात दाखल करण्यात आलं आहे.

अल्पेश पंड्या आपल्या दोन मित्रांसोबत बाइकवरून मंदिरात चालला होता. यावेळी ठाकूर समाजातील तरुणांनी त्यांना अडवलं आणि शिवीगाळ केला. तसंच पीळदार मिशी का ठेवली? अशी विचारणा करत लाठ्याकाठ्यांनी मारहाण केली. अल्पेशने तिथून पळण्याचा प्रयत्न केला. पण आरोपी तरुणांनी त्याला जवळच्याच एका घरात नेले आणि तिथे त्याची मिशी कापली.

'मी दलित असल्यामुळे त्यांनी माझी मिशी कापली आणि बेदम मारहाण केली', असं अल्पेश पंड्याने सांगितलं. 'गावात कुणाशीही माझा वाद नाही. ठाकूर समाजातील कुणाशीही माझे भांडणं नाही. गेल्या दोन वर्षापासून मी मिशी वाढवतोय. पीळदार मिशी ठेवून आणि चश्मा लावून गावात फिरत असल्याने त्यांनी हरकत घेतली. माझ्या आई-वडिलांनाही त्यांनी मारहाण केली', असं अल्पेश पंड्या म्हणाला.

अल्पेश पंड्या हा दलित आहे. त्याचा २० दिवसांपूर्वी ठाकूर समाजातील एका मुलीशी वाद झाला होता. या घटनेमागे तेच कारण असू शकते, असा अंदाज गावाच्या सरपंच जयंती पटेल यांनी व्यक्त केला आहे. दरम्यान, या प्रकरणी पोलिसांनी गुन्हा दाखल केला असून तपास सुरू केला आहे. सध्या गावातील परिस्थिती सामान्य आहे.